महिलालाई सामूहिक बलात्कार गरेको आरोपमा अर्का एक आरोपी पक्राउ

काठमाडौँ - सुर्खेतबाट काठमाडौं आएकी ३३ वर्षीया दुई सन्तानकी आमामाथि बलात्कार गर्ने अर्का एक जना आराेपी पक्राउ परेका छन् । दिउँसो प्रहरीले ती आरोपीलाई पक्राउ गरेको महानगरीय प्रहरी परिसर काठमाडौंका प्रमुख एसएसपी सुदीप गिरीले जानकारी दिए । यसअघि प्रहरीले आठ जनालाई पक्राउ गरेको थियो । 

पक्राउ पर्नेमा युवराज बडुवाल, हिक्मत नेपाली, मुगु घर भएका रतन नेपाली, सुरेश सेजुवाल, दीपक नेपाली, शिवहरी बुढा, अर्घाखाँची घर भएका गोपालकुमार श्रीस, मुगुका हस्त नेपाली र चन्द्र साउद छन् । 

---

उनीहरुले नयाँ बसपार्कको तीन वटा होटलमा लगि महिलालाई सोमबार र मंगलबार पटक-पटक सामूहिक बलात्कार गरेको खुलेको हो । 

 एसएसपी गिरीका अनुसार  काठमाडौं आइपुगेकी ती युवतीलाई बसपार्कमा भेटेका मुगुका युवराज बडुवालले गेस्ट हाउसमा लगेको र गेष्टहाउसमा लगेपछि आफ्नो साथी समेत बोलाएर बलात्कार गरेका थिए ।

सो रात दुई जनाले बलात्कार गरेको र भोलिपल्ट अन्य सात जनाले अर्को गेस्ट हाउसमा लगेर ती युवतीलाई बलात्कार गरेको अनुसन्धानबाट खुलेको प्रहरीले जनाएको छ ।  बलात्कारको पीडा खप्न नसकेर महिला गुहार माग्दै प्रहरीकोमा पुगेकाी थिइन् । त्यसपछि प्रहरीले बलात्कार आरोपीको खोजी गरेको हो । 

श्रीमान लामो समयदेखि भारतमा बेपत्ता भएपछि उनी काम खोज्न काठमाडौं आएकी थिइन् । उनी दुई सन्तानकी आमा हुन् ।