हत्या गरेको आरोपमा ६ जना पक्राउ

स्याङजा - ज्यान सम्बन्धी कसूरमा संलग्न रहेको अभियोगमा ६ जनालाई प्रहरीले पक्राउ गरेको छ । 

पक्राउ पर्नेहरुमा आँधिखोला गाउँपालिका वडा-१ बस्ने २७ वर्षीय सूर्य भन्ने भिम बहादुर सुनार, २४ वर्षीय दिनेश भन्ने रेवत पौडेल, ३७ वर्षीय धन बहादुर विक, २४ वर्षीय गोविन्द भन्ने फुननारायण अधिकारी, २८ वर्षीय साजन कामी र १८ वर्षीय किशोर रहेका छन् । 

---

आँधिखोला गाउँपालिका-१  कालिखर्क जंगलमा ७ जना व्यक्तिहरू अवैध भरूवा बन्दुक लिई वन कुखुरा मार्न जाँदा पुस २० गते राति सोही ठाउँ बस्ने २७ वर्षीय मनोज विकको उक्त भरूवा बन्दुकको छर्रा लागि घटनास्थलमै मृत्यु भएको  थियो । 

घटनामा संलग्न रहेका उनीहरुमध्ये भिम, १८ वर्षीय किशोर, रेवत र धनलाई सोही दिन तथा फुननारायणभ र साजनलाई शुक्रबार रूपन्देही बुटवल बसपार्कबाट प्रहरीले पक्राउ गरेको हो । 

साथै प्रहरीले १ थान एकनाले भरुवा बन्दुक, २ ग्राम बारुद, २४ थान सिसाको छर्रा र ३० बट्टा सलाई समेत बरामद गरेको छ । 

उनीहरु उपर ज्यान सम्बन्धी कसूरमा मुद्दा दर्ता गरी जिल्ला अदालत स्याङजाबाट म्याद थप गरी आवश्यक अनुसन्धान भइरहेको जिल्ला प्रहरी कार्यालय स्याङजाले जनाएको छ ।