अवैध लागूऔषधसहित ४ पक्राउ

काठमाडौं–अवैध लागूऔषधसहित प्रहरीले चार जनालाई पक्राउ गरेको छ। मोरङ, झापा र पर्साबाट लागूऔषध ओसारपसारमा संलग्नहरूलाई प्रक्राउ गरिएको हो।

प्रहरीकाअनुसार मोरङस्थित धनपालथान गाउँपालिका–२ बरियाती टोलबाट करिब ३ किलो १ सय ५ ग्राम अवैध लागूऔषध गाँजासहित एक जना पक्राउ परेका छन्। सोही गाउँपालिकाका ४० वर्षीय वसन्त पासवान पक्राउ परेको प्रहरीले जनाएको छ।

---

विशेष सूचनाको आधारमा प्रहरी चौकी अमाहिवरियातीबाट खटिएको प्रहरीले उनको घर तलासी गर्दा उक्त गाँजा सहित फेला पारी उनलाई पक्राउ गरेको हो । साथै उक्त गाँजा ओसारपसारमा संलग्न रहेको अभियोगमा सुनसरी धरान उपमहानगरपालिका–१६ बस्ने ३६ वर्षीय रबिन राईलाई नगद २० हजार ५ सय रुपैयाँ र सोही ठाउँ बस्ने २९ वर्षीय वचन राईलाई प्रदेश नम्बर १–०२०–०४५ प २६९९ नम्बरको मोटरसाइकल सहित प्रहरीले नियन्त्रणमा लिएको छ ।

त्यस्तै झापा, मेचीनगर नगरपालिका–१० खनाल बस्तीका विक्रम प्रसाई र सोही नगरपालिका–९ का  संजय खड्का पक्राउ परेका छन् । उनीहरु ५ ग्राम अवैध लागूऔषध ब्राउनसुगर जस्तो देखिने पदार्थ, १ थान डिजिटल तराजु र नगद १९ हजार ५ सय रुपैयाँसहित पक्राउ परेका हुन्। । बिशेष सूचनाको आधारमा ईलाका प्रहरी कार्यालय धुलाबारीबाट खटिएको प्रहरीले खड्काको भान्सा कोठा तलासी गर्दा उक्त पदार्थ सहित फेला पारी दुवै जनालाई पक्राउ गरेको हो ।

पर्सा, वीरगंज महानगरपालिका–१५ स्थित सडकबाट नियन्त्रित लागूऔषध २ सय ५० एम्पुल नूफिन, २ सय ५० एम्पुल डाइजेपाम र २ सय ५० एम्पुल फेनारगन सहित धोबिनी गाउँपालिका–२ आशवारी बस्ने १९ वर्षीय पृथ्वी सिंह कुर्मीलाई आइतबार बिहान प्रहरीले पक्राउ गरेको छ । विशेष सूचनाका आधारमा जिल्ला प्रहरी कार्यालय पर्साबाट खटिएको प्रहरीले जाँच गर्ने क्रममा चामलको बोराभित्र लुकाइ छिपाई ल्याएको उक्त लागूऔषध सहित फेला पारी उनलाई पक्राउ गरेको हो ।

यस सम्बन्धमा प्रहरीले थप अनुसन्धान गरिरहेको जनाएको छ।