अवैध लागूऔषधसहित ५ पक्राउ

काठमाडौं - प्रहरीले अवैध लागूऔषधसहित ५ जनालाई पक्राउ गरेको छ। विभिन्न स्थानबाट लागूऔषध ओसारपसारमा संलग्नहरू पक्राउ परेका हुन्। प्रहरीकाअनुसार कमवानपुर, बाग्लुङ, स्याङ्जा र कास्कीबाट लागूऔषधसहित पाँच जना पक्राउ परेका छन्।

मकवानपुरस्थित भिमफेदी गाउँपालिका–२ भैसेबाट १ सय ८३ किलो अवैध लागूऔषध गाँजासहित एक पक्राउ परेका हुन्। थाहा नगरपालिका–२ का रामचन्द्र सिङ्तानलाई सोमबार साँझ प्रहरीले पक्राउ गरेको हो । प्रदेश ३–०१–०२२ च ३५५६ नम्बरको पिकअप गाडीलाई प्रहरी चौकी भैसेबाट खटिएको प्रहरीले जाँच गर्न क्रममा गाडीमा पोका बनाई लुकाई ल्याएको अवस्थामा गाँजासहित पिकअप चालक रामचन्द्र पक्राउ परेका हुन्।

---

त्यस्तै, बाग्लुङको गल्कोट नगरपालिका–५ हटिया चोकबाट करिब २३ किलो अवैध लागूऔषध गाँजासहित वडिगाड गाउँपालिका–८ खोलाखर्कका प्रकाश पाईजालाई सोमबार राति प्रहरीले पक्राउ गरेको छ । जिल्ला प्रहरी कार्यालय बाग्लुङ र ईलाका प्रहरी कार्यालय गल्कोटबाट खटिएको प्रहरीले जाँच गर्ने क्रममा उक्त गाँजासहित फेला पारी उनलाई पक्राउ गरेको हो ।

स्याङजाको फेदीखोला गाउँपालिका–४ सर्केटारीबाट करिब ३ किलो अवैध लागूऔषध गाँजासहित एक जना पक्राउ परेका छन्। सोही गाउँपालिका–१ आरुखर्क बस्ने काभ्रे बन्थली घर भएकी ४३ वर्षीया लक्ष्मी पहारीलाई सोमबार राति प्रहरीले पक्राउ गरेको हो । प्रहरी चौकी फेदीखोलाबाट खटिएको प्रहरीले गाँजासहित उनलाई पक्राउ गरेको थियो।

त्यस्तै, पोखरा महानगरपालिका–२२ जामुने डाँडाबाट नियन्त्रित लागूऔषध १ सय ७१ एम्पुल बुप्रिनर्फिन, १ सय ७१ एम्पुल डाइजेपाम र १ सय ७१ एम्पुल फेनारगनसहित २ जनालाई सोमबार साँझ प्रहरीले पक्राउ गरेको छ । पक्राउ पर्नेहरूमा भारत बिहारका धर्मेन्द्र कुमार र रुपन्देही मर्चवारी गाउँपालिका–५ मजगावाका अविनाश यादव रहेका छन् । पोखरातर्फ आउँदै गरेको लु.३३ प ९३४३ नम्बरको मोटरसाइकललाई लागूऔषध नियन्त्रण व्यूरो शाखा कार्यालय पोखराबाट खटिएको प्रहरीले जाँच गर्न क्रममा मोटरसाइकलमा सवार धर्मेन्द्रको साथबाट उक्त लागूऔषध फेला पारी मोटरसाइकल चालक अविनाशसमेतलाई पक्राउ गरेको हो ।

पक्राउ परेकाहरुमाथि प्रहरीले अनुसन्धान गरिरहेको छ ।