लुटेरा समूहले गरे प्रहरीमाथि आक्रमण, पाँच जना पक्राउ

जनकपुरधाम-  धनुषाकाे बटेश्वर गाउँपालिकामा लुटेरा समूहले प्रहरीमाथि आक्रमण गरेको छ । गएराति लुटेरा समूहकाे आक्रमणबाट गाउँपालिकास्थित प्रहरीचौकीका असई मनोज पोखरेल घाइते भएकाे छ ।

घाइते पाेखरेलकाे प्रादेशिक अस्पताल जनकपुरमा उपचार भइरहेको छ । उनको टाउकोमा ९ वटा टाका लागेको प्रहरीले जनाएको छ । महोत्तरीको भंगहा नगरपालिका ७ का अमित पासवान भारतको मद्रासबाट कमाएर फर्किदै गर्दा लुटेरा समूहले उनीसँग भएका ४५ हजार भारतीय रूपैयाँ, लत्ताकपडा, मोबाइल सहितका सामान लुटपाट गरेकाे थिए ।

---

खबर पाए लगतै असई पोखरेलसहितको प्रहरी टोली घटनास्थल पुगेर लुटेरा समूहलाई पक्राउ गर्न खाेजेपछि लुटेराहरूले उनीमाथि आक्रमण गरेकाे धनुषाका प्रहरी उपरीक्षक बसन्त रजौरेले बताए ।

लुटपाट र प्रहरीमाथि आक्रमण गर्ने पाँच जनालाई प्रहरीले घटनास्थलबाटै पक्राउ गरेको उनले जानकारी दिएका छन । पक्राउ पर्नेमा बटेश्वरकै जीवन ठाकुर, रामबाबु यादव, नरेश रविदास, कमलेश यादव र चन्द्रदेव यादव रहेका छन ।

पक्राउ परेका लुटेरामध्ये स्थानीय जीवन ठाकुरको साथबाट लागुऔषध नाइटरोभेट ट्याब्लेट र चक्कु बरामद  भएको छ भने घटनाबारे थप अनुसन्धान भइरहेको प्रहरी उपरिक्षक रजाैरेले जनाएका छन् ।