अवैध लागुऔषधसहित पक्राउ

काठमाडौं– प्रहरीले विभिन्न स्थानबाट अवैध लागुऔषध बरामद गरेको छ। लागुऔषध ओसारपसारमा संलग्नहरूसमेत पक्राउ परेका छन् ।

कञ्चनपुरको बेलौरी नगरपालिका–६ बुटाबारीबाट करिब ७ ग्राम ५८ मिलिग्राम अवैध लागुऔषध खैरो हेरोईन जस्तो देखिने पदार्थसहित एक जना पक्राउ परेका छन्। कैलाली धनगढी उपमहानगरपालिका–२ बस्ने ३३ वर्षीय  राजेश स्वारलाई प्रहरीले पक्राउ गरेको  हो । से.५ प ८७४८ नम्बरको मोटरसाइकललाई ईलाका प्रहरी कार्यालय बेलौरीबाट खटिएको प्रहरीले जाँच गर्ने क्रममा उक्त पदार्थ सहित फेला पारी उनलाई पक्राउ गरेको हो ।

---

त्यस्तै, अर्घाखाँचीस्थित सितगंगा नगरपालिका–८ सातमाराबाट करिब १ किलो ४ सय ३० ग्राम अवैध लागुऔषध चरेश जस्तो देखिने वस्तुसहित २ जनालाई प्रहरीले पक्राउ गरेको छ । पक्राउ पर्नेहरूमा दाङ राप्ती गाउँपालिका–१ पुलचोक बस्ने ४३ वर्षीय बिर बहादुर खत्री र सोही ठाउँ बस्ने ३७ वर्षीय मनोज थापा रहेका छन् । ईलाका प्रहरी कार्यालय भालुवाङबाट खटिएको प्रहरीले उनीहरुलाई उक्त वस्तुसहित पक्राउ गरेको हो ।

सुनसरी, बराहक्षेत्र नगरपालिका–६ ठाकुर बारीबाट करिब ६ किलो अवैध लागूऔषध गाँजा सहित २ जनालाई मंगलबार राति प्रहरीले पक्राउ गरेको छ । पक्राउ पर्नेहरूमा सोही नगरपालिका–३ बस्ने २८ वर्षीय नगेन राई र उदयपुर चौदण्डी नगरपालिका–१ बस्ने ३२ वर्षीय नबहाङ किराती राई रहेका छन् । ईलाका प्रहरी कार्यायल महेन्द्रनगरबाट खटिएको प्रहरीले उक्त गाँजा सहित फेला पारी उनीहरुलाई पक्राउ गरेको हो ।

त्यस्तै, मकवानपुर मनहरी गाउँपालिका–९ खरंगाबाट करिब ४ किलो अवैध लागूऔषध गाँजा सहित सोही ठाउँ बस्ने ४९ वर्षीय राम बहादुर घलानलाई मंगलबार राति प्रहरीले पक्राउ गरेको छ । उनले लागूऔषध गाँजा बिक्री गरेको भन्ने खबर प्राप्त हुनासाथ ईलाका प्रहरी कार्यालय मनहरीबाट खटिएको प्रहरीले उक्त गाँजा सहित फेला पारी उनलाई पक्राउ गरेको हो ।

यस सम्बन्धमा प्रहरीले थप अनुसन्धान गरिरहेको छ ।