चितुवाको छाला, दाँत र विभिन्न हातहतियारसहित एक पक्राउ

पोखरा–वन्यजन्तु चितुवाको जस्तो देखिने छाला, दाँत र विभिन्न हातहतियारसहित एक जना पक्राउ परेका छन् । पोखरा महानगरपालिका–२२ बाट प्रहरीले खो बहादुर थापालाई पक्राउ गरेको हो ।
थापाले अवैध रुपमा वन्यजन्तुको छाला घरमा लुकाई राखेको भन्ने सूचनाको आधारमा जिल्ला प्रहरी कार्यालय कास्कीबाट खटिएको प्रहरीले उनको घर तलासी गरेको थियो । उनको घरबाट चितुवाको जस्तो देखिने छाला, २ वटा दाह्रासहितको दाँतको भागको टुक्रा र दुई नाले कार्तुस बन्दुकसमेत बरामद गरिएको प्रहरीले जनाएको छ। 
प्रहरीकाअनुसार बन्दुकमा लाग्ने प्रयोग भइसकेको खाली खोका ४५ थान, धातुका छर्रा १ सय ९१ थान, बारुद ३ सय १५ ग्राम, धातुका सानो छर्रा १ सय ५० ग्राम, छर्रा बनाउन प्रयोग हुने सिसाको धातुको विभिन्न आकारको डल्लो पदार्थ २ किलो ९ सय ५ ग्राम र सानो पटाका रहेको रातो रंगको पत्ता १ थानसहित थापालाई पक्राउ गरिएको हो। 
जिल्ला अदालत कास्कीबाट हातहतियार तथा खरखजाना सम्बन्धी कसूरमा ७ दिन म्याद थप गरी आवश्यक अनुसन्धान भइरहेको जिल्ला प्रहरी कार्यालय कास्कीले जनाएको छ ।
 

---