अवैध सम्बन्ध लुकाउन बालिका हत्या आरोपित पक्राउ

पर्सा– बालिका हत्या आरोपमा एक पक्राउ परेका छन्।  वीरगञ्ज महानगरपालिका–१६का १० वर्षीया रिजवाना महतोको हत्या आरोपमा मोतीलालप्रसाद कुर्मी पक्राउ परेका हुन्।

वीरगंज महानगरपालिका–१६ कञ्चनजंगा स्कुल नजिक नयाँ निर्माणाधीन भवनको चेपमा गत पुस २४ गते ढुंगा प्रहार भएको अवस्थामा ती बालिकाको शव फेला परेको थियो। घटनाको अनुसन्धानको क्रममा जिल्ला प्रहरी कार्यालय पर्साबाट खटिएको प्रहरीले घटनामा संलग्न कुर्मीलाई वीरगंज महानगरपालिका–१६ ईनर्वास्थित नेपाल भारत सीमाबाट पक्राउ गरेको हो । प्रारम्भिक अनुसन्धानको क्रममा कुर्मीले अवैध सम्बन्ध लुकाउने उद्देश्यले उक्त घटना घटाएको खुल्न आएको छ । 

---

उनी उपर अपहरण तथा कर्तव्य ज्यान मुद्दामा अनुसन्धान भइरहेको जिल्ला प्रहरी कार्यालय पर्साले जनाएको छ ।