ब्राउन सुगरसहित दुई पक्राउ

सुर्खेत– जिल्ला प्रहरी कार्यालय सुर्खेतले व्राउन सुगर सहित दुई युवालाई पक्राउ गरेको छ । सुर्खेतको गुर्भाकोट नगरपालिका वडा नं. आठका ३२ वर्षीय लक्ष्मण परियार वडा नम्वर ९ बस्ने ३० वर्षीय रमेश वलीलाई  प्रहरीले पक्राउ गरेको हो । 

नेपालगञ्जबाट सुर्खेत आउँदै गरेको सवारीसाधन जाँच गर्दा व्राउनसुगरसहित उनीहरुलाई पक्राउ गरिएको हो । 

---

सुर्खेतको भेरीगंगा नगरपालिका वडा न १० तोलीखोला प्रहरी चेक पोष्ट नजिकै सार्वजनिक पक्की सडकमा प्रहरी सहायक निरीक्षक जिवानन्द दाहालको कमान्डमा सवारी साधन जाँच गर्ने क्रममा म्याजिक गाडीमा उनीहरुलाई फेला पारिएको  प्रहरीले जनाएको छ । 

परियार र वलीलाई शंकास्पद अबस्थामा फेला पारी खानतलासी गर्दा दुई ग्राम ६१० मिलिग्राम व्राउन सुगर फेला परेको प्रहरीले जनाएको छ । घटनाको विषयमा अनुसन्धान भइरहेको प्रहरी निरीक्षक कनक शाहीले जानकारी दिए ।