बलात्कार आरोपित पूर्वमन्त्री बानियाँविरूद्ध पक्राउ पुर्जी जारी

काठमाडाैँ – नेकपा एमालेका नेता तथा मुगुका सांसद मोहन बानियाँविरूद्ध पक्राउ पुर्जी जारी भएको छ।  पूर्वमन्त्री समेत रहेका बानियाँले बाँकेस्थित अप्सरा होटलमा बलात्कार गरेको मुद्दामा जिल्ला अदालत बाँकेले उनीविरुद्ध पक्राउ पुर्जी जारी गर्न आदेश दिएको हो। 

अदालतकाे आदेशपछि जिल्ला प्रहरी कार्यालय बाँकेले बानियाँविरूद्ध पक्राउ पुर्जी जारी गरेकाे हाे। जिल्ला प्रहरी प्रवक्ता डीएसपी मधुसूदन न्यौपानेले बानियाँविरूद्ध पक्राउ पुर्जी जारी भएकाे पुष्टि गरे । ‘पीडित महिलाको जाहेरीका आधारमा बानियाँविरूद्ध सोमबार नै पक्राउ पुर्जी जारी गरेका हौं,’ डिएसपी न्यौपानेले भने,‘आरोपित बानियाँलाई खोजी कार्य जारी छ ।'

---

जुम्लाकी एक ४० वर्षीया शिक्षिकाले बानियाँविरूद्ध बलात्कार जाहेरी प्रहरी कार्यालयमा दर्ता गराएकी थिइन् । महिलाको जाहेरीको आधारमा बिहीबार बानियाँविरूद्ध बलात्कार मुद्दा अदालतमा दर्ता भएको थियाे ।

उनीविरूद्ध पक्राउ पुर्जी जारी भए त्यसबारे सदनमा जानकारी दिनुपर्ने प्रावधान रहे बमोजिम सभामुख तथा सदनलाई समेत जानकारी दिइएको प्रवक्ता न्यौपानले बताए। ‘हामी आरोपितलाई खोजी रहेका छौं,’ उनले भने, ‘प्रहरीले फेला पार्नासाथ नियन्त्रणमा लिन्छ ।’ती महिलाले  दिएको उजुरीपछि जानकारी दिँदा पूर्वमन्त्रीसमेत रहेका बानियाँले आफू निर्दोष रहेको भन्दै आफै प्रहरीमा उपस्थित हुने प्रहरीलाई बताएको भए पनि पछिल्लो समय भने उनी सम्पर्कविहीन छन् ।

पीडितले भने आफूले दिएको २५ लाख रुपैयाँ फिर्ता गर्छु भनेर होटलमा बोलाएको र त्यही होटलमा बिहानीपख बलात्कार गरेको जाहेरीमा उल्लेख गरेकी छन् । त्यसबारे नेता बानियाँले त्यो सबै झुट भएको र पैसा पनि ती महिलाले पाइसकेको भन्दै अब केही कुरा पनि आफूहरूको बीचमा नरहेको भन्दै बचाउ गरेका थिए ।