अवैध लागूऔषधसहित ५ पक्राउ

काठमाडौं–अवैध लागूऔषधसहित प्रहरीले पाँच जनालाई पक्राउ गरेको छ। विभिन्न समय र स्थानबाट लागूऔषध ओसारपसारमा संलग्नहरुलाई पक्राउ गरिएको हो ।

दाङ तुलसीपुर उपमहानगरपालिका–५ न्यूरोड बस्ने ३३ वर्षीय भुपलाल बिकलाई ५ सय मिलीग्राम अवैध लागूऔषध ब्राउन सुगर सहित आइतबार दिउँसो प्रहरीले पक्राउ गरेको छ । भुपलालले आफ्नै घरमा लागूऔषध बिक्री गरी रहेको भन्ने सूचनाको आधारमा ईलाका प्रहरी कार्यालय तुलसीपुरबाट खटिएको प्रहरीले जाँच गर्नेक्रममा उनको साथबाट उक्त लागूऔषध फेला पारी पक्राउ गरेको हो । 

---

त्यस्तै बाँके, नेपालगंज उपमहानगरपालिका–१६ जयसपुरबाट ४ सय मिलीग्राम अवैध लागूऔषध ब्राउन सुगर जस्तो देखिने धुलो पदार्थ सहित सोही ठाउँ बस्ने ३८ वर्षीय साहदत अलि र १८ वर्षीय किशोरलाई आइतबार बेलुकी प्रहरीले पक्राउ गरेको छ । सिमा प्रहरी चौकी जयसपुरबाट खटिएको प्रहरीले जाँच गर्नेक्रममा उनीहरूको साथबाट उक्त पदार्थ फेला पारी पक्राउ गरेको हो । 

झापा, कचनकवल गाउँपालिका–५ डाँगाबारीबाट ५ ग्राम अवैध लागूऔषध ब्राउन सुगर जस्तो देखिने लिसाईलो पदार्थ सहित बिर्तामोड नगरपालिका–२ सैनिक मोड बस्ने २८ वर्षीय सरोज भट्टराई र बिर्तामोड नगरपालिका–९ बस्ने २० वर्षीय विशाल बुढाथोकीलाई आइतबार साँझ प्रहरीले पक्राउ गरेको छ । भारतीय सिँमा नाकाबाट आउँदै गरेको प्र १–०१–०१३ प ७९७४ नम्बरको मोटरसाइकललाई ईलाका प्रहरी कार्यालय बनियानी र प्रहरी चौकी पाठामारीबाट खटिएको संयुक्त प्रहरीले जाँच गर्नेक्रममा उनीहरूलाई उक्त पदार्थ सहित फेला पारी पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।