धनुषामा मोटरसाइकल चोर्ने गिरोह पक्राउ

जनकपुरधाम :  धनुषाबाट प्रहरीले मोटरसाइकल चोरी गर्ने गिरोहलाई पक्राउ गरेको छ । पक्राउ पर्नेहरुमा सिरहा विष्णुपुर गाउँपालिका ३ रजखोर निवासी २१ वर्षिय रोहितकुमार यादव, विष्णुपुर गाउँपालिका २ राजपुरका २१ वर्षिय प्रमोदकुमार यादव, मनोज यादव, जितेन्द्र यादव र धनुषाको सबैला नगरपालिका ४ पटेर्वाका २० वर्षिय अमरेन्द्र यादव रहेका छन् ।

पक्राउ परेकाहरुलाई मोटरसाइकलसहित जिल्ला प्रहरी कार्यालय धनुषाले पत्रकार सम्मेलन गरी आइतबार सार्वजनिक गरेको हो । पक्राउ परेकाहरुको साथबाट प्रहरीले ६ वटा मोटरसाइकल, चोरीमा प्रयोग भएका तीनवटा पेचकस, ब्याट्री, रेन्ची तीनवटा  र लेगार्ड एक थानसमेत बरामद गरेको छ । बरामद गरिएका मोटरसाइकलहरु सवारी धनीलाई सम्पर्क गरी जिम्मा लगाइने प्रहरीले जनाएको छ । पक्राउ परेकाहरुलाई हिरासतमा राखेर थप अनुसन्धान प्रक्रिया अघि बढाइएको छ । 
 

---