अपराध

क्यानडा उडाउने दिल्ली ‘कनेक्सन’

क्यानडा पठाइदिने भन्दै ३३ जनाबाट ९० लाख रुपैयाँ असुली, पैसा भारत पुर्‍याउने भण्डारीलाई प्रहरीले भेटेन

अनिष भट्टराई |
फागुन ११, २०७७ १४:१५ बजे

पोखरा : पर्वत मोदी-७ का धीरज विक वैदेशिक रोजगारीका लागि ओमानमा थिए । त्यहाँ हुँदा उनको भेट भीमबहादुर सुनारसँग भयो । सुनारसँग धीरजको कुराकानी बाक्लो हुन्थ्यो । बढ्दो निकटतापछि सुनारले अनलाइनमार्फत भिसा अप्लाई गरेर भारतको बाटो हुँदै नेपालीलाई क्यानडा लैजाने गरेको धीरजले थाहा पाए । 

धीरजलाई सुनारले ‘अफर’ गरे । प्रत्येक व्यक्तिसँग १५ लाख लिएर क्यानडा लैजाने र सोबापत् धीरजलाई २ लाख ५० हजार रुपैयाँ दिने प्रस्ताव सुनारको थियो । धीरजले प्रस्ताव स्वीकारे । उनलाई अब धेरैभन्दा धेरै मान्छे क्यानडा जान फकाउनुपर्ने थियो । 

धीरजले आफ्ना साथी दीपक कार्कीलाई अफर गरे । दीपकले क्यानडा जान मान्छे खोजेबापत् ५० हजार रुपैयाँ दिने धीरजको आश्वासन थियो । युनियन लाइफ इन्सोरेन्समा कार्यरत दीपक पनि क्यानडा जान मानिसलाई प्रलोभनमा पार्न थाले । धीरजकै भनाइमा सुनार दिल्लीमा बस्थे । सुनारलाई यहाँबाट पैसा पठाउन बुटवलका शिक्षादेव भण्डारीले सहयोग गरे । अनि सुरु भयो मानिसलाई झुक्काउने खेल । 

२ वर्ष अघिबाट सुरु भएको यो खेलको सिकार धेरै बने । प्रहरीमा जाहेरी पाएपछि खुल्न थालेको खेलको पर्दा विस्तारै उघ्रदैछ । माघ दोस्रो साता कास्की प्रहरीले ठगी मुद्दामा पर्वतका धीरजलाई पक्राउ गर्यो‍ । पोखरा–३० सिसुवा बस्दै आएका ३८ वर्षीय धीरजलाई ३३ जनाबाट ९० लाख ७१ हजार ५ सय रुपैयाँ ठगी गरेको आरोपमा प्रहरीले पक्रियो । 

धीरजलाई ३३ जनामध्ये कोहीले व्यक्तिगत त कोहीले संयुक्त जाहेरी दिएका थिए । ३३ जनासँग धीरजले १ लाख देखि १५ लाखसम्म लिएका छन् । जिल्ला प्रहरी कार्यालय कास्कीमा १० जनाले संयुक्त जाहेरी दिएका थिए । भेषबहादुर पुन मगर, बिलबहादुर पुन मगर, चोलाकान्त सुवेदी, उत्तम तिवारी, इमानबहादुर भुजेल, निरल अर्याल, सुरेन्द्र पौडेल, ढुण्डिराज ढकाल, नन्दबहादुर घर्ती र भक्तबहादुर घर्तीले आफूहरुलाई धीरजले ठगी गरेको भन्दै एकमुष्ठ १७ लाख ४६ हजार बिगो असुल्नु पर्छ भनी जाहेरी दिएका थिए । 

अर्का जाहेरवाला उमेश थापालाई उनले पटकपटक गरी १५ लाख रुपैयाँ ठगेको जनाइएको छ । करिब ३ महिना अगाडि आफूलाई १५ लाखमा युरोपेली देश पठाउँछु भनेपछि आफूले सो रकम तिर्न तयार भएको बताएका थिए । थापाबाट सुरुमा धीरजले ३ लाख नगद पेश्की लिएका थिए । पछि भिसा आयो भनेर ७ लाख नगद र ५ लाखको चेक विकले लिए । 
 
थापालाई १५ लाख ठगेका धीरजले अर्का व्यक्ति विक्रम कार्कीबाट करिब ११ लाख रुपैयाँ ठगी गरे । विक्रमबाट धीरजले १० लाख ३६ हजार रुपैयाँको चेक लिएका थिए । योबीचमा धीरजले अन्य व्यक्तिबाट पनि रकम असुलेका थिए । उनले सबैको विश्वास जित्न विभिन्न बैंकका चेक दिए । उनले प्रहरीसमझ बयानमा भनेका छन्, ‘विक्रमबाट लिएको पैसा उमेशलाई चेक दिएँ र उमेशबाट लिएको पैसालाई देखाएर विक्रमलाई चेक दिएँ ।’ 

प्रहरीले आइतबार धीरजलाई कास्की अदालतको कठघरामा उभ्यायो । अदालतमा उनले आफूले ठगी नगरेको र साँच्चिकै भिसा लगाइदिने गरेको बताए । उदाहरणमा उनले उमेश थापा र विक्रमको भिसा एप्रुभ भइसकेको समेत बयान दिए । ‘मैले विक्रम र उमेशको भिसा एप्रुभ भएको जानकारी घरमै गएर दिएको हुँ, अरुको पनि काम हुँदै थियो, कोरोनाले रोकिदियो,’ अदालतमा उनले भने । दुईजनाको भिसा लगाइसकें भन्ने धीरजको आफ्नै वैध म्यानपावर कम्पनी भने छैन । 

धीरजले सबै व्यक्तिको नागरिकताको प्रतिलिपि, फोटोहरू कुरियरमार्फत भीमबहादुर सुनारलाई पठाउने गर्थे । सुनार दिल्लीमा बस्ने डेरामै कागजात पठाउने गरेको उनको दाबी छ । ‘३३/३४ जनाको डकुमेन्ट स्क्यान गरेर भारत नै पठाउने गरेका थियौं, कुरियर र कहिलेकाहीँ शिक्षादेवले नै लैजाने गर्थे,’ उनले अदालतमा भनेका थिए । 

धीरज आफूले लिएको रकम फिर्ता गरिसकेको र धेरै जनाबाट दीपक कार्कीले नै रकम असुलेको बयान दिए । आफूबाट दीपक कार्कीले अहिलेसम्म १८ लाख रुपैयाँ कमिसन लिएको र आफूले दिन भए जति सबैलाई फिर्ता दिइसकेको उनले अदालतसमक्ष बताएको जिल्ला अदालत कास्कीका सूचना अधिकारी नील पनेरुले बताए । 

१८ लाख दीपकले र बाँकी पैसा भीमबहादुर सुनारले लिएको उनको बयान थियो । उनले दिएको बयान अनुसार शिक्षादेव भण्डारीमार्फत् धीरजले एकपटकमा ४२ लाख र अर्को पटकमा ३२ लाख ६५ हजार रुपैयाँ सुनारलाई पठाएका थिए । 

तर अदालतमा दीपक कार्कीले बयान दिँदा आफूले धीरजबाट एक रुपैयाँ नलिएको र उल्टै ९० हजार रुपैयाँ धीरजबाट लिन भएको बताएका थिए । सुरुमा आफूले ५÷७ जनालाई धीरजसँग भेट गराइदिएको भने उनले स्वीकारेका छन् । 

धीरजले भनेअनुसार बुटवलका शिक्षादेव भण्डारी प्रहरीले भने फेला पारेको छैन । धीरजले प्रहरी र अदालतमा शिक्षादेव भण्डारीमार्फत पैसा पठाउने गरेको बताए पनि ती मान्छे आफूहरूले नभेटेको कास्की प्रहरीका प्रवक्ता सुवास हमाल बताउँछन् । साथै भीमबहादुर सुनार दिल्ली बस्ने भनिए पनि नेपालमै रहेको हुनसक्ने र भण्डारीलाई ‘भरिया’ का रूपमा प्रयोग गरिएको हुनसक्ने प्रहरीको आँकलन छ । ‘भीमबहादुरको घर गुल्मी भएको बताइएको छ, कहाँ बस्छ भन्ने नै धीरजले खुलाउँदैन, शिक्षादेव भनिने मान्छे सम्पर्कमै छैन,’ हमालले भने । 

९० लाख ठगी अभियोगमा जेल चलान 
कास्की जिल्ला अदालतले क्यानडा लैजाने भनेर थुप्रै व्यक्तिलाई ठगेको अभियोगमा धीरज विकलाई कारागार पठाउन आदेश दिएको छ । जिल्ला न्यायाधीश श्रीकृष्ण भट्टराईको इजलासले विश्वकर्मालाई कारागार पठाउन आदेश दिएको हो । अदालतका सूचना अधिकारी नीलप्रसाद पनेरुका अनुसार आइतबारको पेसीमा बहस गर्दा धीरजलाई कारागार पठाउने आदेश आएको हो । 

‘फौजदारी कार्यविधि संहिता, २०७४ को दफा ६७ को अवस्था देखिँदा प्रमाण बुझ्दै जाँदा ठहरेबमाजिम हुने गरी हाललाई कानुन बमोजिम सीधा खान पाउने गरी कारागार पठाइदिनू,’ भनी आदेश गरिएको पनेरुले बताए । 

दीपक भनिने भोजबहादुर कार्कीलाई अदालतले १८ लाखको धरौटी बुझाउन आदेश गरेको छ । कार्कीले धिरजबाट केही रकम लिएको स्वीकारेको हुँदा प्रमाण बुझ्दै जाँदा ठहरेबमोजिम हुनेगरी धरौटी माग गरिएको हो । उनले धरौटी रकम नबुझाएपछि बुझ्दै जाँदा ठहरेबमोजिम हुनेगरी धरौटी माग गरिएको हो । धरौटी रकम नबुझाएपछि कार्कीलाई कारागार चलान गरिएको अदालतका सूचना अधिकारी पनेरुले बताए ।



Author

अनिष भट्टराई

भट्टराई इकागजका गण्डकी प्रतिनिधि हुन्


थप समाचार