विभिन्न किसिमका लागूऔषधसहित चार जना पक्राउ

काठमाडाै – विभिन्न स्थानबाट लागूऔषधसहित चार जना पक्राउ परेका छन् । प्रहरीकाअनुसार सिरहा जिल्लाको लहान नगरपालिका २३ स्थित तिलवना चोकबाट  सशस्त्र प्रहरीले विभिन्न किसिमका लागूऔषधसहित दुई जनालाई पक्राउ गरेको हो । पक्राउ पर्नेहरुमा सोही ठाउँका अजय सहनी र शंकर सहनी छन् ।

बी.आर ३२ एडी २६१७ नम्बरको भारतीय मोटरसाईकलमा सवार उनीहरुलाई सशस्त्र प्रहरी बल नेपाल नम्बर २ छिन्नमस्ता बाहिनी मुख्यालय महोत्तरी र सुरक्षा बेश लहानबाट खटिएको सशस्त्र प्रहरीले शंका लागि जाँच गर्दा उनीहरुको साथमा नोफीन ३ सय एम्पुल, प्रोमेथाजीन हाईड्रोक्लोराईड २ सय ५१ एम्पुल र डाईजापाम २ सय ९८ एम्पुल फेला पारिएको हो । त्यसवेला सो मोटरसाईकल समेत बरामद गरिएको छ ।

---

यसैगरी महोत्तरी जिल्लाको सम्सी गाउँपालिका ६ स्थित कन्हवा ईलाकाबाट सशस्त्र प्रहरीले लागूऔषधसहित दुई जनालाई पक्राउ गरेको छ । पक्राउ पर्नेहरुमा सोही जिल्लाको बर्दिबास नगरपालिका १४ का कृष्ण बलम्पाकी र सिन्धुली जिल्लाको कमलामाई नगरपालिका १ का देव आले मगर छन् ।

प्रहरीकाअनुसार प्रदेश नम्बर ०२–००३ प ७७४५ नम्बरको मोटरसाईकलमा सवार उनीहरुलाई सशस्त्र प्रहरी बल नेपाल बिओपी सम्सीबाट खटिएको सशस्त्र प्रहरीले शंका लागि जाँच गर्दा उनीहरुको साथमा एसपीएमपीआरएक्स ९५ क्याप्सुल र एक्जीप्लोन १ बोतल फेला पारेको हो । त्यसवेला सो मोटरसाईल समेत बरामद गरिएको छ । पक्राउ परेकाहरुलाई बरामद लागूऔषध तथा मोटरसाईकलसहित आवश्यक कारवाहीको लागि नेपाल प्रहरीलाई बुझाईएको छ ।