कतारको राष्ट्रिय दिवस मनाइयो

काठमाडौँ - कतारले विभिन्न कार्यक्रम गरी राष्ट्रिय दिवस मनाएको छ । 

कतारका संस्थापक शेख जसिम बिन मोहम्मद बिन थानीद्वारा कतार एकीकरणको स्मरण गरी राष्ट्रिय दिवस मनाइन्छ । थानीले सन् १८७८ को डिसेम्बर १८ देखि आधुनिक कतार राज्यको अवधारणा ल्याएर कतार  एकीकृत, एकताबद्ध र स्वतन्त्र राज्यका रुपमा अघि बढाएका थिए ।

---

विभिन्न देशमा रहेका कतारका राजदुतावासले पनि राष्ट्रिय दिवस  मनाउने गरेका छन् । राष्ट्रिय दिवसका अवसरमा नेपालस्थित कतारी राजदुतावासले काठमाडौँमा विभिन्न कार्यक्रमको आयोजना गरेको छ । राष्ट्रिय दिवसका अवसरमा आयोजित रात्रिभोजमा उपराष्ट्रपति रामसहायप्रसाद यादवले कतारी जनतालाई शुभकामना दिएका थिए ।

नेपालका लागि कतारी राजदुत मिशाल विन मोहमद अलअन्सारी र उपराष्ट्रपति यादवले संयुक्तरूपमा केक काटेर रात्रिभोजको सुरूवात गरेका थिए । 

नेपाल कतार बीचको सम्बन्ध सन् १९७७ मा स्थापना भएको हो । यस वर्षको अप्रिलमा कतारका अमिरले नेपाल भ्रमण गरेका थिए । डिसेम्बर १८ कतारले राष्ट्रिय एकता हासिल गरेको र स्वतन्त्र राज्य बनेको दिन हो ।