परराष्ट्र मन्त्रालयले भन्यो – भारतीय प्रधानमन्त्री मोदीको भ्रमणबारे आधिकारिक खबर केही आएको छैन

काठमाडौँ- परराष्ट्र मन्त्रालयले भारतीय प्रधानमन्त्री नरेन्द्र मोदीको भ्रमणबारे अहिलेसम्म कुनै आधिकारिक जानकारी प्राप्त नभएको पुष्टि गरेको छ ।

भारतीय प्रधानमन्त्री मोदी बुद्ध पूर्णिमाको अवसरमा नेपाल भ्रमणमा जाने भएकाे साेमबार अखबार द हिन्दूले समाचार लेखेकाे थियाे । स्रोतलाई उद्धृत गर्दै अखबार हिन्दूले लेखेको छ, 'सन् २०१९ मा पुनः प्रधानमन्त्री निर्वाचित भएपछि मोदीको यो पहिलो नेपाल भ्रमण हुनेछ।'

---

परराष्ट्रका एक कर्मचारीले भने,' भीभीआईपी भ्रमण हुने कुरा मन्त्रालयलाई थाहा हुनु पर्ने हो तर, त्यस विषयमा कुनै पनि जानकारी प्राप्त भएको छैन । अहिलेसम्म कुनै भ्रमण उच्चस्तरबाट हुने जानकारी आइसकेको छैन । निकट भविष्यमा खबर आउला भन्ने बेग्लै कुरा हो । भ्रमणको खबर प्राप्त भएको भए सूचना दिन अप्ठयारो हुँदैन थियो ।'

प्रधानमन्त्री शेरबहादुर देउवाले एक महिना अघि भारत भ्रमण गरेका थिए । सोही समयमा देउवाले मोदीलाई नेपाल भ्रमणको निम्तो दिएको ती कर्मचारीले बताए । स्रोतका अनुसार भ्रमणको सम्भावनाहरू अझै पनि बाँकी छ ।

उच्च कूटनीतिक तहको भ्रमण हुँदा परराष्ट्र मन्त्रालयले प्रोटोकल मिलाउने गर्छ  । अहिलेसम्म कूटनीतिक भ्रमण हुने भनेर खबर प्राप्त नभएको परराष्ट्र स्रोतले दाबी गर्‍यो ।

निकट भविष्यमा उच्चस्तरीय भ्रमण हुन सक्ला बाहिर समाचारमा आएजस्तो आधिकारीक खबर प्राप्त नभएको ती कर्मचारीको भनाइ छ । नेपालभित्र हुने जुनसुकै निकायमा उच्चस्तरको भ्रमण हुने भए पनि परराष्ट्र मन्त्रालयले जानकारी हुने गरेको उनको भनाइ छ ।

'भारतीय प्रधानमन्त्री मोदी जस्तो उच्चस्तरीय व्यक्तिको भ्रमण हुँदा शान्ति, सुरक्षा र हस्पिटालिटीको व्यवस्थापनको कुराहरू हुन्छन्,' परराष्ट्र सोत भन्छ,' उच्चस्तरको व्यक्तिको भ्रमण हुँदा परराष्ट्रले सबै कुराको व्यवस्थापन मिलाउने गरेको छ ।'

प्रधानमन्त्री भएपछि मोदीले सन् २०१४ र २०१८ मा दुई पटक नेपालको भ्रमण गरेका थिए। २०१८ मा जनकपुर र मुक्तिनाथ भ्रमण गरेका थिए।