परराष्ट्र मन्त्रालयले सार्वजनिक गर्‍यो मोदीको लुम्बिनी भ्रमण तालिका

काठमाडौँ– परराष्ट्र मन्त्रालयले नेपाल भ्रमणमा आउन लागेका भारतीय प्रधानमन्त्री नरेन्द्र मोदीका भ्रमण तालिका सार्वजनिक गरेको छ । भारतीय प्रधानमन्त्री मोदी नेपाली समकक्षी शेरबहादुर देउवाको निमन्त्रणामा जेठ २ गते बुद्ध जयन्तीको दिन सिधै लुम्बिनी आउनेछन् । 

उनी भारतीय सीमावर्ती सहरबाट हेलिकप्टरमा लुम्बिनी उत्रने बताइएको छ । लुम्बिनी ओर्लेलगत्तै मोदीलाई परराष्ट्रमन्त्री नारायण खड्काले स्वागत गर्नेछन् ।

---

प्रधानमन्त्री देउवा र भारतीय प्रधानमन्त्री मोदीले मायादेवी मन्दिरमा आयोजित प्रार्थना सभामा भाग लिनेछन् । उनीहरूले गुम्बा क्षेत्रमा बौद्ध सांस्कृतिक तथा सम्पदाको शिलान्यास गर्ने कार्यक्रम रहेको छ । त्यसपछि दुवै प्रधानमन्त्री लुम्बिनी अन्तर्राष्ट्रिय बौद्ध ध्यान केन्द्र र सभा गृहमा आयोजित बुद्ध जयन्ती समारोहमा सरिक हुनेछन् ।

दुवै प्रधानमन्त्रीबीच लुम्बिनीमा द्विपक्षीय छलफल, नेपाल–भारत सहयोग सम्बन्धी समझदारीको आदान–प्रदान र आपसी चासोका विषयमा कुराकानी हुनेछ । 

प्रधानमन्त्री नरेन्द्र मोदीको भ्रमणले नेपाल र भारतबीचको सदियौं पुरानो समाजिक–सांस्कृतिक सम्बन्ध थप मजबुत हुने परराष्ट्र मन्त्रालयले जनाएको छ ।

भारतीय प्रधानमन्त्री मोदीको यो पाँचौ नेपाल भ्रमण हो ।