सात महिनादेखि स्वास्थ्य बीमाको भुक्तानी भएन

तनहुँ - दमौली अस्पतालले सात महिनादेखि स्वास्थ्य बीमा वापतको रकम भुक्तानी पाउन सकेको छैन । गतमाघ महिनादेखि साउन महिनासम्म दुई करोड ६५ लाख १६ हजार तीन सय ९४ बक्यौता रहेको हो । अस्पताललाई समयमा रकम भुक्तानी नगरिदिँदा औषधिको अभाव देखिन थालेको दमौली अस्पताल स्वास्थ्य बीमा इन्चार्ज मदन गौतमले जानकारी दिए । 

गौतमका अनुसार स्वास्थ्य बीमा बोर्डबाट रकम निकाशा नगरिदिँदा उपचारमा आएका बिरामीले औषधि पाउनका लागि समस्या हुने गरेको छ । अस्पतालमा दैनिक तीन सयदेखि चार सयसम्म बिरामी उपचारका लागि आउने गरेका छन् । उनले भने, 'उपचारमा आउने बिरामीमध्ये करिब ८० प्रतिशत बिरामी स्वास्थ्य बीमाका हुने गरेका छन् ।' 

---

अस्पतालका अनुसार माघ महिनामा २८ लाख १० हजार नौ सय २१, फागुनमा रु ३४ लाख ३६ हजार सात सय ३८ र  चैतमा ४१ लाख ७३ हजार चार सय १५ रकम भुक्तानी हुन बाँकी छ । वैशाख ३६ लाख ६५ हजार चार सय ८९, जेठमा ४५ लाख ३९ हजार पाँच सय पाँच, असारमा ३८ लाख ५८ हजार दुई सय ५१ र साउन महिनामा ४० लाख ९२ हजार छ सय ७५ रकम भुक्तानी भएको छैन ।

औषधि व्यवसायीलाई लामो समयदेखि रकम भुक्तानी नगरिदिँदा पुनःऔषधि मगाउन नसकिएको अस्पतालका प्रमुख डा परिवर्तन बरालले जानकारी दिए । 

'अस्पतालको फार्मेसीमा औषधिको अभाव हुन थालिसकेको छ', उनले भने, 'आजका मितिसम्म जेनतेन धान्दै आएको थियौँ, अब धान्न गाह्रो हुने देखिएको छ ।'

उनका अनुसार १५ शय्या क्षमताको यस अस्पतालले ५० शय्या बराबरको उपचार सेवा प्रदान गर्दै आइरहेको छ । अस्पतालमा तनहुँसहित छिमेकी जिल्ला गोरखा, लमजुङ र कास्कीका केही भेगका मानिसहरुको उपचारमा आउने गर्दछन् । रासस