सरकारले १४ वर्षमुनिका बालबालिकाको क्यान्सर उपचार निःशुल्क गर्ने

काठमाडौँ - सरकारले १४ वर्षमुनिका बालबालिकाको क्यान्सर उपचार निःशुल्क गर्ने भएको छ । 

बुधबार भक्तपुर क्यान्सर अस्पतालमा आयोजित एक कार्यक्रमकाबीच स्वास्थ्यमन्त्री प्रदीप पौडेलले बाल क्यान्सर विरामीहरुको निशुल्क सेवा शुभारम्भ गरेका हुन् । यसअघि मन्त्री पौडेलले सरकारी अस्पतालमा १४ वर्षमुनिका बालबालिकाको क्यान्सर उपचार निःशुल्क गर्नेगरी मन्त्रीस्तरीय निर्णय गरेका थिए । 

---

निशुल्क स्वास्थ्य सेवा शुभारम्भ गर्दै मन्त्री पौडेलले सम्वन्धीत क्यान्सर अस्पतालको सक्रियतामा नै बालबालिकाको क्यान्सर उपचार निःशुल्क गर्ने काम सुरु भएको बताए ।  क्यान्सर उपचारका लागि परिक्षण र वेड खर्च अस्पतालले निःशुल्क गर्ने र औषधीका लागि भने हालका लागि खर्च मन्त्रालयले व्यहोर्ने उनले बताए । 

मन्त्री पौडेलले क्यान्सर क्षेत्रमा सक्रिय रहेका गैर सरकारी संस्थासंग समन्वय गरेर अघि बढ्ने उल्लेख गरे । 

उनले १४ वर्षमाथिका महिलाहरुलाई क्यान्सर निरोधक भ्याक्सीन प्रदान गर्ने तयारी सुरु गरेको जानकारी दिए । क्यान्सर स्कृनिङ कार्यक्रमलाई पनि मन्त्रालयले तीव्रताका साथ अघि बढाउने उनको भनाइ छ ।