उद्योगले जनशक्तिलाई व्यवस्थापकीय तालिम दिनुपर्छ : डिन शर्मा

काठमाडौं - व्यवस्थापन विषय अध्ययन गरेका जनशक्तिलाई उद्योग तथा कम्पनीले रोजगारी दिँदा व्यवस्थापकीय सिप र तालिम दिनुपर्ने त्रिभुवन विश्वविद्यालय व्यवस्थापन संकायका डिन प्राडा डिल्लीराज शर्माले बताए । 

शनिबार काठमाडौंमा पद्मकन्या बहुमुखी क्याम्पसको वाणिज्य व्यवस्थापन संकाय स्‍नाकोत्तर तह (मास्टर अफ बिजनेस म्यानेजमेन्ट कोर्ष) ले आयोजना गरेको 'वाणिज्य व्यवस्था शिक्षा विषय'को अन्तरक्रिया कार्यक्रममा डिन शर्माले सो कुरा बताए । उनले वाणिज्य व्यवस्थापन पढेका जनशक्तिलाई उद्योगले रोजगारी दिँदा सिप विकासको तालिम दिएर सक्षम बनाउनुपर्ने बताए । 

---

कार्यक्रममा महालक्ष्मी विकास बैंकका प्रमुख कार्यकारी अधिकृत बोधराज देवकोटाले वाणिज्य व्यवस्थापनको अध्ययन गरेका विद्यार्थीले अरूको कम्पनीमा रोजगारी गर्नुभन्दा आफै रोजगारको सिर्जना गर्नुपर्ने बताए ।  उनले व्यवस्थापनमा जोखिम हुने भएकोले जोखिम र निर्णय लिनसक्ने व्यक्ति नै सफल हुने बताए । प्रमुख कार्यकारी अधिकृत देवकोटाले व्यवस्थापनका विद्यार्थीले बजारमा आफ्नो सामान र आफूलाई चिनाउन सक्ने हुनुपर्ने बताए । 

पद्मकन्या बहुमुखी क्याम्पस वाणिज्य व्यवस्थापन संकायका प्रमुख सह-प्राध्ययापक अग्निधर पराजुलीले वाणिज्य व्यवस्थापन कार्यक्रमलाई राम्रोसँग अगाडि बढाउने बताएका छन् । पराजुलीले राम्रो जनशक्ति उत्पादन गरेर विद्यार्थीलाई उद्योग तथा कम्पनीमा राम्रो स्थानसम्म पुर्याउने बताए । 

त्यस्तै, पद्मकन्या बहुमुखी क्याम्पस प्रमुख जयालक्ष्मी प्रधानले वाणिज्य व्यवस्थापनका लागि आवश्यक पर्ने सबै कुराको व्यवस्थापनमा सहयोग गर्ने बताए । 

पद्मकन्या बहुमुखी क्याम्पसले गत वर्षदेखि मास्टर अफ बिजनेस म्यानेजमेन्ट कोर्ष सञ्चालन गर्दै आएको छ । पहिलो ब्याच दोस्रो सेमेस्टरमा अध्ययन गर्दैछ ।