काठमाडौं उपत्यकाका विद्यालयहरू दसैंअगाडि नखुल्ने

काठमाडौँ – काठमाडौं उपत्यकाका विद्यालय दसैंअगाडि नखुल्ने भएका छन् । स्वास्थ्य तथा जनसंख्या मन्त्रालयमा बुधबार निजी विद्यालयहरूका संगठनहरू प्याब्सन तथा एनप्याब्सन, अभिभावक, शिक्षा तथा स्वास्थ्य मन्त्रालयका उच्च अधिकारीहरूसहितको बैठकले यस्तो निर्णय गरेको हो । 

बैठकमा सहभागीहरूले उपत्यकामा कोभिड– १९ संक्रमण महामारीको जोखिम कायमै रहेकाले विद्यालय खोल्नु उचित नहुने धारणा राखेका छन् । बैठकमा कोभिड– १९ संक्रमण नियन्त्रण कार्यदल (सीसीएमसी)का प्रतिनिधि, स्वास्थ्य मन्त्रालयका उच्च अधिकारी, शिक्षा तथा विज्ञान, प्रविधि मन्त्रालयका सचिवसमेतको सहभागिता थियो ।

---

बैठकले थोरै संख्यामा विद्यार्थी भएका विद्यालयका केही कक्षा सञ्चालन गर्दै जाने र दसैंपछि पूर्ण क्षमतामा भौतिक रूपमै विद्यालय खोल्ने निर्णय गरेको बैठकमा सहभागी शिक्षा मन्त्रालयका प्रवक्ता दीपक शर्माले बताए ।

काठमाडौं उपत्यकाका केही स्थानीय तहले भदौ दोस्रो साताबाटै विद्यालय सञ्चालन गरेपछि निर्णयमा एक रूपताका लागि स्वास्थ्य तथा जनसंख्या राज्यमन्त्री उमेश श्रेष्ठले सरोकारवालालाई बैठकमा बोलाएका हुन् ।