चिकित्सा शिक्षा आयोगको गाँठो फुकाउने काम गर्छु : शिक्षामन्त्री पौडेल

भक्तपुर – शिक्षा, विज्ञान तथा प्रविधिमन्त्री देवेन्द्र पौडेलले भक्तपुरको सानोठिमीमा रहेका चिकित्सा शिक्षा आयोग र शिक्षा तथा मानव स्रोत विकास केन्द्रको निरीक्षण गरेका छन् । 

शुक्रबार मन्त्री पौडेलका साथै राज्यमन्त्री वोधमायाकुमारी यादव र शिक्षा मन्त्रालयका सचिव रामप्रसाद थपलियासहितको टोलीले आयोग र केन्द्रको निरिक्षण गरेको हो । निरिक्षणपछि मन्त्री पौडेलले सय दिनभित्र नतिजा आउने गरी काम गर्न निर्देशन दिए ।

---

शिक्षामन्त्री पौडेलले संविधानले व्यवस्था गरेका जनताका शैक्षिक हकलाई व्यवहारमा प्रकट हुने गरी काम गर्न लाग्ने बताए । उनले आयोगले काम गर्ने क्रममा आइपर्ने समस्याको गाँठो फुकाउने प्रतिबद्धतासमेत जनाए ।

उनले आयोग र केन्द्र दुवै कार्यालयलाई ३ महिने, एक वर्षे र नीतिगत प्रक्रियाका कार्य योजना बनाई काम गर्न निर्देशन दिए । यसअघि मन्त्री पौडेलले बिहीबार प्राविधिक शिक्षा तथा व्यावसायिक तालिम परिषद् (सीटीइभीटी) को निरीक्षण गरेका थिए ।