छात्रवृति पाएपछि प्राविधिक शिक्षामा छात्राको बढ्दो आकर्षण

काठमाडाैँ – तुलसीपुर उपमहानगरपालिकाले सञ्चालनमा ल्याएको मेट्रो कलेजमा छात्राहरुको सङ्ख्यामा उल्लेखनीय वृद्धि भएको छ । 

छात्रवृत्ति प्रदान गर्न थालेपछि छात्राहरुको सङ्ख्यामा उल्लेखनीय वृद्धि भएको हो । “हामीले पिछडिएको, अति गरिब छात्राहरुलाई छात्रवृत्ति प्रदान गर्ने गरेका छौँ”, कलेजका प्रमुख वसन्त आचार्यले भने, “त्यसले गर्दा अहिले प्राविधिक शिक्षा पढ्ने छात्राहरुको सङ्ख्यामा वृद्धि भएको हो ।”

---

प्राविधिक शिक्षा पढ्ने छोरीहरुको चाहनालाई पूरा गर्न छात्रवृत्तिको व्यवस्था गरेको कलेज प्रमुख आचार्यले बताए । सामुदायिक विद्यालयबाट एसइई गरेका उपमहानगरपालिकाभित्रका छात्राहरुलाई निःशुल्क प्राविधिक विषयको अध्यापन गराउन थालेको उनको भनाइ छ । अहिले शिक्षालयमा डिप्लोमा तहका विभिन्न १० वटा कार्यक्रम सञ्चालन भइरहेका छन् ।  हालसम्म ६४२ विद्यार्थीहरुले अध्ययन गरिरहेका छन् । तीमध्ये २१७ जनाले निःशुल्क रुपमा अध्ययन गरिरहेका छन् । 

आफूहरु यसरी छात्रवृत्तिमा पढ्न पाउँदा खुसी भएको रुकुमकी एरिका सुनारले बताए । उनले कानुन विषयमा अध्ययन गरिरहेका छन्।  कलेजमा अहिले बाहिरी जिल्लाबाट पनि विद्यार्थी आउने गरेका छन् । अहिले २५ जिल्लाबाट विद्यार्थीहरु पढ्न आउने गरेका छन् । शिक्षालयको भवन निर्माणका लागि प्रदेश सरकारबाट २० करोड रुपैयाँभन्दा बढीको काम भइरहेको छ ।