मकवानपुरको मनहरीमा मतगणना स्थगित

मकवानपुर – मकवानपुरको मनहरी गाउँपालिकामा मतगणना स्थगित गरिएको छ । मनहरीको वडा नम्बर ९ को मतगणना कार्य स्थगित गरिएको हो । मतपेटिकालाई कपडाले नढाकेको बिषयलाई लिई बिबाद उत्पन्न भएपछि अर्को सुचना जारी नभए सम्मको लागि स्थगित गरिएको निर्वाचन अधिकृत पूर्णबहादुर दर्जीले बताए । 

वडा नम्बर – ९ को एउटा मतपेटिका कपडाले नछोपिएको अवस्थमा भेटिएपछि राजनितिक दलका प्रतिनिधिले छोपिएको अवस्थमा हुनु पर्ने भनि विवाद निकाले पछि निर्वाचन अधिकृतको कार्यालयले मतगणना कार्यलाई अनिश्चित समय सम्मको लागि स्थागित गरिएको सूचनामा उल्लेख छ । १ देखि ८ सम्मको गणनामा शान्तिपूर्ण तरिकाले सर्वदलीय बैठकमा भएको निर्णय अनुसार मत गणना कार्य सम्पन्न भएको थियो । 

---

मतपेटिकामा अन्तराष्ट्रिय मापदण्ड अनुसारको मान्यता प्राप्त डिजिटल सिल गरिने व्यवस्था अनुसार ५ वटा सिल लगाइएको हुन्छ । जुन सिल एक पटक तोडेपछि पुन लगाउने सकिदैन । सिलमा उल्लेख हुने डिजिटल नम्बर दलको प्रतिनिधिहरूसँग रुजु गरेमा सहजै मतपेटिका साटिएको हो वा हैन पत्ता लाग्छ । सहजै विवाद सुल्झाउन सकिने भए पनि कुरा बुझाउने नसक्दा मतगणना नै अवरुद्ध भएको हो । 

मकवानपुर जिल्ला मुख्य निर्वाचन अधिकृत डिल्लिरत्न श्रेष्ठले सिल गरिएको बाकस चौर मै फालिए पनि सुरक्षाको दृष्टिकोणले कुनै समस्या नहुने बताए । ‘सिल गरिएको बाकस चौर मै फालिए पनि सुरक्षाको दृष्टिकोणले कुनै समस्या हुन्न, कपडाले किन ढाक्न पर्‍यो,' मकवानपुर जिल्ला मुख्य निर्वाचन अधिकृत डिल्लिरत्न श्रेष्ठले भने ।