धनपालथान गाउँपालिकाको अध्यक्ष र उपाध्यक्षमा कांग्रेस विजयी

विराटनगर - मोरङको धनपालथान गाउँपालिकाको अध्यक्ष र उपाध्यक्षमा नेपाली कांग्रेसका उम्मेदवार निर्वाचित भएका छन् ।

 बिहीबार सम्पन्न मतगणनाको अन्तिम परिणाम अनुसार धनपालथानमा नेपाली कांग्रेसका जिवछ प्रसाद गच्छदारले नेकपा एमालेका मुसहरु मण्डललाई २७१ मतले पराजित गरेका हुन् ।

---

गणनाको सुरुवातदेखि नै अग्रता लिएका एमालेका उम्मेदवार मण्डल अन्तिमतिर आइपुग्दा पराजित भएका हुन् । गच्छदारले ६ हजार ३२९ र मण्डलले ६ हजार ५८ मत प्राप्त गरेका छन् । उपाध्यक्षमा निवर्तमान उपाध्यक्ष रहेकी नसिमा बानोले एमालेकी उपासी राजवंशीलाई ५०० मतले पराजित गरिन् । 

बानोले ६ हजार २८४ र राजवंशीले ५ हजार ७६७ मत प्राप्त गरेकी हुन् । धनपालथानका सात वटा वडाहरु मध्ये नेपाली कांग्रेसबाट वडा नं. ४ मा श्रीराम चौधरी र ६ मा महमद हुसैन वडाध्यक्षमा निर्वाचित भएका छन् । 

वडा नं. १ मा खाजा हुसैन मियाँ, ३ मा नागेश्वर मण्डल, ५ मा गयानन्द सरदार र ७ मा सन्तोष कुमार यादव माओवादी केन्द्रबाट वडाध्यक्ष निर्वाचित भएका छन् । नेकपा एमालेका पंकज कुमार मण्डल वडा नं. २ को वडाध्यक्ष चुनिएका छन् ।