निर्धक्क भएर मतदान गर्न मतदातालाई प्रमुख निर्वाचन आयुक्तको आह्वान

काठमाडौँ – प्रमुख निर्वाचन आयुक्त दिनेशकुमार थपलियाले निर्धक्क भएर मतदान गर्न मतदाताहरूलाई आह्वान गरेका छन् । कसैको प्रलोभन वा प्रभावमा नपरी आफूलाई मन परेको उम्मेदवारको निर्वाचन चिह्नमा स्वस्तिक छाप लगाउन उनले आह्वान गरेका हुन् । 

आफूले प्रदान गरेको अमूल्य मत बदर नहुने गरी निर्धक्क तरिकाले मतदान गर्न उनको आग्रह छ । प्रतिनिधिमूलक शासन व्यवस्थाको आधारशिला र लोकतन्त्रको सार्थक अभ्यास गर्ने माध्यम निर्वाचन भएको भन्दै प्रमुख आयुक्त थपलियाले पद, पैसा र पहुँचबाट निर्देशित नहुन र आश्वासनमा नपर्न पनि आह्वान गरेका छन् ।

---

मतदान सकिनासाथ सुरक्षित तरिकाले मतपेटिका ढुवानी र लगत्तै गणनाको व्यवस्था मिलाइएको आयोगले जनाएको छ । मतदानको अघिल्लो दिनसम्म १८ वर्ष उमेर पूरा भएका नागरिकलाई मतदानको व्यवस्था गरिएको पहिलो अवसर भएको थपलियाले बताए ।