बैतडीको दशरथचन्दमा एमालेका उम्मेदवार विजयी

काठमाडौँ- बैतडीको दशरथचन्द नगरपालिका नेकपा एमालेका उम्मेदवार विजयी भएका छन्। एमालेका उम्मेदवार बनेका पुष्करराज जोशी विजयी भएका हुन । उनले निकटतम प्रतिद्वन्द्वी नेपाली कांग्रेसका गजेन्द्रसिंह रावललाई  पराजित गरेका हुन्। जोशीले ६ हजार ५ सय ८५ मत ल्याउँदा रावलले ५ हजार ४ सय २७ मत प्राप्त गरेका थिए ।
जोशी गएको स्थानीय तहको निर्वाचनमा पनि ६२ मतले मात्रै नेपाली कांग्रेसका नरेन्द्रसिंह थापासँग पराजित भएका थिए । यस्तै वडा नम्बर १ मा एमालेका विष्णुदत्त भट्टले जितेका छन् भने वडा नम्बर २ मा एमालेकै सूर्यबहादुर बोहराले जितेका छन् । वडा नम्बर ३ मा पनि एमालेकै अजब पाण्डेले जिते । वडा नम्बर ५ मा कांग्रेसका केशव लेखकले जिते भने वडा नम्बर ६ मा पनि कांग्रेसकै महेन्द्र कार्की विजयी भए ।

वडा नम्बर ७ मा एमालेका हरि दत्त बडुले जित हासिल गरेका छन् । वडा नम्बर ८ मा कांग्रेसका चामुसिंह थापाले जित हासिल गर्दा वडा नम्बर ९ मा एमालेका मोहन देव जोशीले जिते । वडा नम्बर १० मा कांग्रेसका त्रिलोक सिंह विष्ट र वडा नम्बर ११ मा एमालेका जय दत्त पन्तले जितेका छन् ।

---