पूर्वका उद्योगमा फेरि बिजुली आपूर्ति कटौती

काठमाडौं - नदीमा पानी सतह घट्ने र भारतबाट रातिको समयमा बिजुली आउने क्रम रोकिएपछि प्रदेश १ का उद्योगहरुमा १२ घण्टा विद्युत् आपूर्ति कटौती पुनः सुरु भएको छ ।

पूर्वमा बेलुकी ६ बजेदेखि भोलिपल्ट बिहान ६ बजेसम्म आपूर्ति कटौती गर्नु परेको नेपाल विद्युत् प्राधिकरणको दुहवी ग्रीड शाखाका प्रमुख राजेश रेग्मीले बताए ।

---

उनका अनुसार नेपालको बिजुली उत्पादन हिजोदेखि कमी आएकै बेला भारतले रातिको बिजुली नदिएपछि उद्योगलाई करिब ५० देखि ६५ मेगावाट मेगावाटको बिजुली कटौती गरिएको हो । 

पूर्वमा दुहवीको कूल माग १६० मेगावाट, अनारमणिको ४५ र दमकको ३० मेगावाट गरी २३५ मेगावाट छ । आपूर्ति भने काबेली कोरिडरबाट ४५, भारत र नेपालको प्रणालीबाट करिब १३० मेगावाट छ । 

‘ढल्केबर–मुजफ्फपुर र कुसाहा–कटैयाबाट राति बिजुली नआएकाले यो समस्या आएको हो,’ उनले इकागजसँग भने, ‘यही बेला हाम्रो खोलामा पानीको सतह घटेर उत्पादनमा पनि कमी आएको हो । 

आगामी जेठ १५ सम्म यस्तो समस्या रहने प्राधिकरणका प्राविधिकहरु बताउँछन् । बीच–बीचमा पानी प¥यो भने आपूर्तिमा सुधार हुने सम्भावना रहेको छ ।

आगामी वैशाख ३० गते स्थानीय तहको चुनाव भएकाले भोट घट्ने डरले गार्हस्थ्य क्षेत्रका उपभोक्ताकहाँ ‘निर्वाध’ बिजुली आपूर्ति भइरहेको हो । ‘बीचमा पानी परेको थियो, बिहारले पनि राति अलि अलि दिएको थियो,’ रेग्मीले भने, ‘अहिले हाम्रो उत्पादन पनि घट्ने र रातिको समयमा नआउने भएकाले उद्योगलाई बिजुली कटौती गर्न बाध्य हुनुपरेको हो ।’

कुसाहा–कटैया प्रसारण लाइनबाट दिउँसो भने १५० मेगावाटसम्म बिजुली आउने गरेको छ ।