बाउबाजेले सुरू गरेकाे छाला व्यवसाय धान्दै सिन्धुकोटका बासिन्दा

चौतारा- गाउँमै व्यवसाय गरेर आर्थिक रूपमा सक्षम बन्न सकिन्छ भन्ने उदाहरण बनेका छन् मेलम्ची नगरपालिका–५ सिन्धुकोटका दीपक बोगटी । विसं २०७० मा रोजगारी खोज्दै मलेसिया गएका उनी अहिले गाउँ फर्केर स्वरोजगार बन्दै अन्यलाई पनि रोजगारी दिइरहेका छन् ।

बोगटीले छाला व्यवसाय सुरू गरेको दुई वर्ष भयो । विदेशमा सोचेभन्दा कम आम्दानी भएपछि नेपाल फर्किएर व्यवसाय गरेको बताउने उनको छाला व्यवसायमा पाँच जनाले रोजगारी पाएका छन् । बोगटी मात्रै होइन सिन्धुकोटका ९० घरले उक्त व्यवसाय गरिरहेका छन् । नब्बे घरको उद्योग व्यवसायको अध्यक्षसमेत बोगटी नै हुन् । बाउबाजेले परम्परागत रूपमा गर्दै आएको व्यवसाय अहिले आधुनिकीकरण गदै नयाँ उपकरणद्वारा सञ्चालन गर्दा झनै राम्रो उत्पादन हुने गरेको अर्का व्यवसायी बालकुमार बस्यालले बताए ।

---

उनका अनुसार पहिला–पहिला बाजेहरूले हातले बनाउने गर्दथे भने अहिले आधुनिक उपकरणद्वारा सामग्री उत्पादन गरिन्छ । अहिले सिन्धुकोटमा चारवटा उद्योग सञ्चालनमा आएका छन् । छाला ब्याग उद्योगमा छालाबाट बन्ने विभिन्न सामग्री उत्पादन हुने गरेका छन् ।

परम्परागत रूपमा गर्दै आएको छालाको सामान बनाउने पेशालाई आधुनिक उपकरणद्वारा ब्याग, स्कुलब्याग, ल्यापटप ब्याग, पर्स, बेल्टलगायत सामग्री बनाउन थालेपछि युवाहरूले गाउँमै बसेर मनग्य आम्दानी गरेका छन् । नगरपालिका, सङ्घसस्था, वडा कार्यलयहरूसँग सम्मन्व गरेर काम गरिरहेको अर्का व्यवसायी चुलबहादुर बस्यालले बताए ।