काठमाडौँ - काठमाडौँ महानगरपालिकाले दशैँ पर्वका समयमा सहरी सरसफाई र फोहोर व्यवस्थापनलाई नियमित गर्ने योजना बनाएको छ । वातावरण तथा कृषि विभागका प्रमुख सरिता राईकाअनुसार कर्मचारीको विदा, पर्वमा उत्पादन हुने फोहोरको प्रकृति र ल्याण्डफिल साइटका स्थानीयको मागलाई व्यवस्थापन गर्दै फोहोर संकलन, ढुवानी र अन्तिम विसर्जनको काम  नियमित गर्ने योजना बनाइएको हो । 

‘स्थानीयहरुले अष्टमीदेखि एकादशीसम्मका ४ दिन ल्याण्डफिल साइट बन्द गर्न अनुरोध गरेका छन् । यसैअनुसार आज हामीले सहरको फोहोर संकलन गरेका छौँ । तर, साइटमा पठाएका छैनौँ । दशैँमा कर्मचारीहरुलाई पनि आलोपालो खटाउनु पर्ने हुन्छ । त्यसैले निश्चित जनशक्ति परिचालन गरेर सरसफाई र फोहोर व्यवस्थापनलाई नियमित गर्छौँ ।’ विभागका प्रमुख राईले भनिन्, ‘सफाईकर्मीलाई पर्व मनाउने अवसर उपलब्ध गराउन महानगरबासीको पनि योगदान रहन्छ । यसका लागि हामी अनुरोध गर्न चाहन्छौँ, कम फोहोर उत्पादन गरिदिनोस्, उत्पादित फोहोरलाई वर्गीकरण गरेर राख्नोस्, सफाईकर्मी नआउञ्जेल घरबाहिर फोहोर ननिकाल्नोस् ।’

---

विभागले दशैँका लागि सडक, मठमन्दिर, चोकलगायत सार्वजनिक स्थलहरुको विशेष सरसफाइ गरिरहेको छ । सरसफाईका लागि आज पनि कर्मचारीहरु बढार्ने, झार उखेल्ने तथा गोडमेल गर्ने, पानी तथा चुन छर्किने काम भइरहेको छ । वडाहरुको ८ वटा समूहमा विभाजन गरेर त्यस क्षेत्रको फोहोर व्यवस्थापनमा सहभागी निजी कम्पनी तथा संघ संस्थालाई सहभागी गराएर सरसफाई चलाइएको हो । 

निजी तथा गैरसरकारी संघ संस्थाहरुको योजना 

सहरको फोहोर व्यवस्थापनमा आवद्ध निजी तथा गैरसरकारी कम्पनी तथा संघ संस्था पनि ल्याण्डफिल साइट सञ्चालन भए कामलाई निरन्तरता दिने बताएका छन् । महानगरले दिएको निर्देशन पालना गर्छौँ । नेप्सेम्याकका अध्यक्ष टीका दाहाल भन्छन्, ‘हामीले कर्मचारीहरुको विदालाई सिफ्टमा आलोपालोमा मिलाएका छौँ । संकलित फोहोर व्यवस्थित गर्न हामी हाम्रा संयन्त्र परिचालन गर्न सक्छौँ ।’ दाहालले भने, ‘हामीले फोहोर उत्पादकलाई कुहिने र नकुहिने फोहोर छुट्ट्याएर छुट्टाछुट्टै प्लाष्टिक वा बोरामा राख्न अनुरोध गरेका छौँ । फोहोर ढुवानी गर्दा प्रकृतिअनुसार फरकफरक दिन र सवारीमा गर्छौँ ।’ 
दशैअवधिमध्ये फुलपाती र अष्टमीका दिन धेरै फोहोर उत्पादन हुन्छ ।