वर्षा नहुनु र डढेलो लाग्नु प्रदूषणको मुख्य कारण : वातावरण विभाग

काठमाडौँ- वातावरण विभागले जंगलमा लागेको डढेलोका कारण वायु प्रदूषण बढेको बताएको छ । वातावरण विभागका प्रवक्ता शंकरप्रसाद पौडेलले डढेलोका कारण नै देशभरको प्रदूषणको मात्रा बढेको बताएका हुन् ।

पानी नपर्दा र हावा वहन नसक्दा प्रदूषण एकै ठाउँमा थुप्रिएको उनकाे भनाइ छ । उनले स्याटलाइट इमेज हेर्दा काठमाडौँ उपत्यकामा बारा, पर्सा र चितवनबाट निस्किएको धुवाँका कारण प्रदूषण बढेको बताए ।

---

बारा, पर्सा र चितवनबाट बागमती करिडोर हुँदै काठमाडौँमा आएको हावा अन्यत्र वहन नसक्दा काठमाडौँ उपत्यकामा प्रदूषणको मात्रा बढेको उनले उल्लेख गरे । उनले काठमाडौँ प्रदूषणको पहिलो नम्बरमा पर्‍यो जस्ता समाचारहरू सञ्चार माध्यममा आइरहेको तर त्यसले ठूलो फरक नपार्ने बताए । उनले प्रदूषणको पहिलो, दोस्रो नम्बरमा पर्‍यो भन्ने कुरा प्रचारबाजीको विषयवस्तुमात्रै भएको जिकिर गरे ।

प्रवक्ता पौडेलले प्रदूषणको मात्रा बढेकाले सबैले मास्कको अनिवार्य प्रयोग गर्नुपर्ने, थप सतर्कता अपनाउनुपर्ने र सकेसम्म घरबाहिर निस्किन नहुने बताए ।