‘जलवायु परिवर्तनको असरबाट बच्न फलफूलका बिरुवा रोप्नुपर्ने’

काठमाडौँ - वन तथा वातावरण मन्त्री ऐनबहादुर शाही ठकुरीले जलवायु परिवर्तनको असरबाट बच्न फलफूलका बिरुवा रोप्नुपर्नेमा  जोड दिएका छन् ।

प्रथम जननिर्वाचित प्रधानमन्त्री बिपी कोइरालाको एक सय ११औँ जन्मजयन्तीका अवसरमा आज नेपाल ट्रेड युनियन कांग्रेस आबद्ध नेपाल राष्ट्रिय सुरक्षा गार्ड श्रमिक सङ्घले सिंहदरबारस्थित बगैँचामा आयोजना गरेको वृक्षारोपण कार्यक्रमलाई सम्बोधन गर्दै उनले जलवायु परिवर्तनको असरबाट मुलुकलाई बचाउन देशभर यस्ता कार्यक्रममा जोड दिनुपर्ने  बताएका हुन् । 

---

रोपिएका बिरुवाको संरक्षण पनि गर्नुपर्ने मन्त्री ठकुरीको भनाइ थियो । पशुपन्छीलगायत जनावरलाई खानाको व्यवस्था गर्न सामुदायिक एवं राष्ट्रिय वनमा पनि फलफूलका बिरुवा रोप्नुपर्ने उनले बताए । सामुदायिक एवं राष्ट्रिय वनमा वृक्षारोपण गरे बाँदरलगायत जीवजन्तुले बालीनालीमा गर्नेे क्षति कम हुने मन्त्री ठकुरीको धारणा थियो ।

नेपाल ट्रेड युनियन कांग्रेसका अध्यक्ष योगेन्द्रकुमार कुँवरले वातावरण अनुकूलनका लागि फलफूलका बिरुवाले सहयोग गर्ने बताए । ट्रेड युनियन कांग्रेस र आवद्ध संस्थाले यस्ता कार्यक्रमलाई देशव्यापी बनाउने उनको प्रतिबद्धता थियो । 

नेपाल ट्रेड युनियन कांग्रेसका पूर्वअध्यक्ष खिलानाथ दाहालले फलफूलका बिरुवा रोप्दा आयात प्रतिस्थापन गरी निर्यात वृद्धि गर्न सकिने बताए । सो अवसरमा नेपाल ट्रेड युनियन कांग्रेसका केन्द्रीय सदस्य महेन्द्र यादव, राष्ट्रिय सुरक्षा गार्ड श्रमिक संघका अध्यक्ष किशोर ढुङ्गेल, महासचिव जोखेमान बललगायतले फलफूलका बिरुवा रोप्दा वातावरण संरक्षण हुने धारणा राखेका थिए । ​

यसैबीच राष्ट्रिय सुरक्षा गार्ड श्रमिक सङ्घले आजै ललितपुर महानगरपालिकास्थित नख्खु दोबाटोमा पनि वृक्षारोपण गरेको थियो । वृक्षरोपण गर्दै ललितपुर महानगरपालिकाका प्रमुख चिरीबाबु महर्जनले महानगर क्षेत्रलाई हरियाली बनाउन यस्ता कार्यक्रमले सहयोग गर्ने बताएका थिए । 

कार्यक्रममा नेपाल ट्रेड युनियन कांग्रेसका महासचिव अजय राईले बिरुवा रोप्ने कार्यक्रमलाई देशव्यापी बनाइने बताए । दुवै स्थानमा आँप, लिची, कटहर, अम्बालगायतका दुई सय फलफूलका बिरुवा रोपिएको राष्ट्रिय सुरक्षा गार्ड श्रमिक संघका महासचिव बलले जानकारी दिए ।