राजापुरमा जंगली हात्ती मृत भेटियो, करेन्ट लगाएको आशंका

बुटवल- नेपाल-भारत सिमाना नजिक पर्ने बर्दियाको राजापुर नगरपालिका १० ढुण्डिपुर गाउँमा जंगली हात्ती मृत अवस्थामा फेला परेको छ ।

नेपाल-भारत सिमाना नजिक राजापुर नगरपालिका-१० ढुण्डिपुर गाउँको गहुँ तोरी खेतमा आज बिहान जंगली हात्ती मृत अवस्थामा फेला परेको राष्ट्रिय प्रकृति संरक्षण कोष बर्दियाका प्रमुख डाक्टर रबिन कडरियाले जानकारी दिए ।

---

मृत अवस्थामा फेला परेको जंगली हात्ती विद्युतीय धरापमा करेन्ट लागेको हुन सक्ने प्रारम्भिक अनुमान गरिएको छ । घटनास्थलमा डिभिजन वन कार्यालय, निकुञ्ज तथा सुरक्षाकर्मी टोली पुगिसकेको र मृत्यु भएको विषयमा अनुसन्धान भइरहेको उनले बताए ।

केही दिनदेखि जंगली हात्तीले गाउँमा बालीनालीमा क्षति र घरगोठ भत्काउन थालेको र तीन दिनअघि मात्रै जंगली हात्तीको आक्रमणबाट एक जनाको ज्यान गएपछि सोही क्षेत्रका स्थानीयवासी आतंकित तथा आक्रोशित थिए ।

जंगली हात्तीको आतंकका कारण मर्कामा परेका स्थानीयले विद्युतीय धराप राखेको हुनसक्ने अनुमान गरिएको छ ।