कोभिड प्रभावित व्यवसायीलाई बागमती सरकारले १० लाख रुपैयाँसम्‍म ऋण दिने

काठमाडौं : कोभिड-१९ बाट शिथिल भएका व्यवसायलाई बागमती प्रदेश सरकारले १० लाख रुपैयाँसम्‍म सहुलियत ब्याजदरमा कर्जा दिने भएको छ । चालु आर्थिक वर्षको बजेटमार्फत प्रदेश सरकारले यस्तो कार्यक्रममा ३ अर्ब रुपैयाँ ऋण लगानी गर्ने घोषणा गरेको थियो । सोही अनुसार सहुलियत कर्जाको कार्यक्रम ल्याएको हो ।

वार्षिक ३ प्रतिशत नबढ्नेगरी ब्याजदर निर्धारण गरेको आर्थिक मामिला तथा योजना मन्‍त्रालयले जानकारी दिएको छ । पाँच वर्षका लागि दिइने ऋण कृषि, पशुपंक्षी, माछापालन क्षेत्रको उत्पादकत्व वृद्धिमा केन्द्रित छ । यसले रोजगारी सिर्जना गर्ने, वन तथा वातावरण क्षेत्रको प्रवर्धन समेत गर्ने मन्‍त्रालयले जानकारी दिएको छ ।

---

ऋण प्रवाह हुने प्रमुख क्षेत्रहरूमध्ये कृषि व्यवसाय, उद्योग व्यवसाय, पर्यटन प्रवर्धन, व्यापार, वन तथा वातावरण, महिला तथा दलित समुदाय विकास र फोहोरमैला व्यवस्थापन छ ।  

कर्जाका लागि बागमती प्रदेशभित्रका कृषि विकास बैंक र साना किसान लघुवित्त वित्तीय संस्थाका शाखा कार्यालयहरूमा दिन सकिने उल्‍लेख छ ।