बैंकिङ ज्यादतीविरुद्ध संयुक्त आन्दोलनको घोषणा

काठमाडौं- बैंक तथा वित्तीय संस्थाहरूले ज्यादती गरेको भन्दै नेपाल राष्ट्रिय व्यवसायी महासंघलगायत विभिन्न ३५ संघ/संस्थाहरूले संयुक्त आन्दोलनको घोषणा गरेका छन् ।

आइतबार काठमाडौंमा पत्रकार सम्मेलन गर्दै उनीहरूले बैंकिङ ब्याजदर एक प्रतिशत कायम गराउनु पर्ने, व्यवसायीलाई आर्थिक राहतको व्यवस्थापन गर्नुपर्ने, सेवा शुल्क घटाउनु पर्ने लगायतका माग राख्दै आन्दोलनको घोषणा गरेका हुन् ।

---

अर्थतन्त्रको मुख्य मेरुदण्डका रूपमा रहेका व्यवसायीहरू आफ्नो पेसाबाट पलायन हुने अवस्था आउनुमा बैंक तथा वित्तीय क्षेत्रको अव्यवहारिक गलत नीति, निजी स्वार्थ, सरकारले दीर्घकालीन उत्पादनमुखी अर्थतन्त्रमा प्राथमिकता नदिनु रहेको उनीहरूले बताएका छन् । उनीहरूले आफूहरूको माग पूरा नभए तालाचाबी सरकारलाई बुझाउने चेतावनी दिएका छन् ।

पत्रकार सम्मेलनमा नेपाल राष्ट्रिय व्यवसायी महासंघका केन्द्रीय अध्यक्ष कुमार कार्कीले बैंक तथा वित्तीय संस्थाले चर्को रूपामा ब्याजदर बढाउँदा र लिलामी निकाल्दा पनि सरकार मौन बसेको आरोप लगाए । उनले बैंक तथा वित्तीय संस्थाबाट व्यवसायीलाई अत्याउने र धम्क्याउने काम भएको बताए ।

नेपाल यातायात व्यवसायी राष्ट्रिय महासंघका केन्द्रीय वरिष्ठ उपाध्यक्ष सरोज सिटौलाले पछिल्लो अवस्थामा बैंकहरू फाइदामा लगानीकर्ता घाटामा भएको बताए ।