सुन तस्करी प्रकरण : भन्सार विभागले बनायो छानबिन समिति

काठमाडौं– त्रिभुवन अन्तर्राष्ट्रिय विमानस्थलको भन्सारबाट जाँचपास भएको ठूलो परिणामको सुन बरामद भएपछि त्यसको छानबिनका लागि भन्सार विभागले समिति बनाएको छ । विभागको अनुसन्धान शाखाका निर्देशक मानबहादुर पौडेलको नेतृत्वमा छानबिन समिति बनाइएको हो ।

एअरपोर्ट भन्सारबाट जाँचपास भएको सो सुन सिनामंगलमा ट्याक्सीबाट जफत भएको थियो । छानबिन समितिले काम सुरु गरिसकेको र सो समितिले जाँचपासको कस्को संलग्नता र जिम्मेवारीमा को थिए भने छानबिन गर्ने विभागले जनाएको छ ।

---

समितिले विमानस्थलको सिसिटिभी फुटेज हेर्ने, अन्य कर्मचारीसँग साृेधपुछ गर्नेसमेत काम गर्नेछ ।

मंगलबार राति १० बजे हङकङबाट आएको क्याथे प्यासेफिकको उडानमा स्कुटरको ‘ब्रेक सु’ ल्याइएको भनेर स्टिकर टाँसिएको थियो । एअरपोर्टबाट एक सय ५४ केजीको मोटरसाइकलको ‘ब्रेक सु’ भनिएको त्यो लगेज सहजै बाहिर निक्लियो ।

त्यसलाई पछ्यायो राजस्व अनुसन्धान विभागको टोलीले । अन्तर्राष्ट्रिय विमानस्थल भन्सारसमेत पार गरेर सिनामंगल सडकसम्म पु¥याइएको त्यो लगेज ट्याक्सीमा हाल्दाहाल्दै बरामद गरियो । अनि अनुसन्धान गर्दै हेरियो र भेटियो ठूलो मात्रामा सुन ।

विभागका महानिर्देशक नवराज ढुङ्गानाले ८० देखि १०० किलोको बीचमा रहेको सुन बरामद गरिएको जानकारी दिए । विभागले मंगलबार नै सुन बरामद गरेको भए पनि योबारे बाहिर सार्वजनिक भने बुधबार साँझ मात्रै भयो ।

विभागले अहिलेसम्म यसमा संलग्न ६ जनालाई पक्राउ गरिसकेको छ। जसमा एक जना एजेन्टसमेत छन्।