पूर्वाधार निर्माणका योजना अनुगमन सुरु, सामग्रीको गुणस्तरमाथि निगरानी

काठमाडौँ- अनुगमन तथा मूल्याङ्कन समितिले आजदेखि पूर्वाधार योजनाहरूको अनुगमन सुरु गरेको छ । समितिकी संयोजक सुनिता डंगोल, सहरी योजना आयोगका उपाध्यक्ष डा. सुमननरसिंह राजभण्डारी, समितिका सदस्यहरू, इञ्जिनियरसहितको टोलीले आज वडा नं. २९ को निर्माणाधीन कार्यालय भवन र ब्याडमिन्टन कोर्टको अनुगमन गर्यो । 

'पूर्वाधार निर्माणको योजना, लागतअनुमान र सार्वजनिक खरिद प्रक्रियामा उल्लेख भएका सर्तहरू अनुगमनका सूचक हुन्,' अनुगमनका क्रममा संयोजक डंगोलले भनिन्, ‘लगानी बराबरको नतिजा प्राप्त गराउनु अनुगमनको उद्देश्य हो ।’  

---

अनुगमनका क्रममा आयोगका उपाध्यक्ष डा. राज भण्डारीले बालुवा, डण्डी, सिमेन्ट, इटा जस्ता निर्माण सामग्री र निर्माण विधिमा निगरानी गर्नुपर्ने बताए । उनले भने, 'निर्माण अवधिमा सामग्रीको गुणस्तर हेर्छौँ । आवश्यकताका आधारमा अब गुणस्तर परीक्षण गराउने काम थालिनेछ ।’ 

योजना अनुगमन तथा मूल्याङ्कन एकाइका प्रमुख सुमित्रा लामिछानेका अनुसार पूर्वाधार योजनाको नियमित अनुगमन थालिएको छ । यसको थालनीमा ठूला १० वटा योजनाको अनुगमन गरिनेछ । 

पहिलो चरणमा अनुगमन गरिने ठूला योजनाहरू वडा नं. ३, ४, ९, १६, २२, २६ र २९ वडामा छन् ।

आजको अनुगमनको निष्कर्षका बारेका जानकारी दिँदै लामिछानेले भनिन्, 'निर्माण पक्षलाई गुणस्तर परीक्षणको प्रतिवेदन उपलब्ध गराउन, ढलानलगायतका काम गर्दा अनुगमन समिति र महानगरपालिकाका प्राविधिक विज्ञहरूको उपस्थितिमा काम गर्न निर्देशन दिइएको छ ।'

वडा कार्यालयको अनुगमन गर्दा छड, सिमेन्टको गुणस्तर, निर्माण स्थलको सतह, भूमिगत तला, निर्माण सामग्रीको मिश्रण र मोटाइलगायत पक्ष हेरिएको थियो । यस्तै ब्याडमिन्टन कोर्टको उपयोग र पहुँचको पक्ष हेरिएको थियो ।