प्रहरीद्वारा चार अर्ब तीन करोड ४४ लाख बराबरको राजस्व सङ्कलन

काठमाडौँ- राजस्व चुहावट र तस्करीका क्षेत्रमा देखिएका नवीन प्रवृत्ति र प्रमुख समस्याको पहिचान गरी प्रभावकारी रूपमा तस्करी नियन्त्रण गर्न नेपाल प्रहरी सक्रिय रहेको छ । तस्करी नियन्त्रण गरी राजस्व सङ्कलन गर्ने क्रममा चालु आर्थिक वर्षको हालसम्म जम्मा रु चार अर्ब तीन करोड ४४ लाख ९६ हजार ५२९.४८ पैसा बराबरको राजस्व सङ्कलन भएको जनाइएको छ । 

उक्त राजस्व चोरी, पैठारी तथा अवैध सुन, चाँदी, मालसामान, नदीजन्य पदार्थ, अवैध काठ बरामद, अवैध मुद्रा, हुन्डी कारोबार, ट्राफिक जरिवाना, फैसला कार्यान्वयनलगायत शीर्षकबाट सङ्कलन भएको हो । ती शीर्षकमा संलग्न सात हजार छ सय ७९ जनालाई प्रहरीले कानुनी दायरामा ल्याई उक्त राजस्व सङ्कलन गरेको केन्द्रीय प्रहरी प्रवक्ता एवं प्रहरी नायब महानिरीक्षक भीमप्रसाद ढकालले जानकारी दिए । उनका अनुसार राज्यको कानुन कार्यान्वयनका क्रममा फैसला कार्यान्वयनबाट पक्राउ, अवैध भन्सार छली, ट्राफिक कारबाहीलगायत कार्यबाट नेपाल प्रहरीले वार्षिक रूपमा ठूलो परिमाणमा राजस्व सङ्कलन गर्दै आएको छ । 

---

लुकाईछिपाई भन्सार छली गर्ने, अवैध रूपले सामान भित्र्याउनेजस्ता राजस्व चुहावटका क्षेत्रमा देखिएका समस्या भएको प्रवक्ता ढकालले बताए । उनले भने, 'यस्ता समस्याको समाधान गर्दै चेकजाँचमा कडाइ गर्ने, आधुनिक प्रविधिको प्रयोग गर्ने, निगरानी र नियन्त्रणका उपाय अवलम्बन गरी प्रहरीले सक्रिय रूपमा काम गर्दै राजस्व सङ्कलनमा योगदान दिएको र राजस्व चुहावट नियन्त्रणमा खटिएका सरोकारवाला निकायका कर्मचारीसँग समन्वय तथा सहकार्य गरी नेपाल प्रहरीले काम गर्दै आएको छ ।'

सङ्कलित राजस्वमध्ये अवैध मालसामान बरामदबाट रु एक अर्ब ३६ करोड ४४ लाख तीन हजार दुई सय ५६, ट्राफिक जरिवानाबाट रु एक अर्ब १० करोड ३६ लाख ४५ हजार तीन सय ५४ र फैसला कार्यान्वयनबाट रु एक अर्ब दुई करोड ७८ लाख तीन हजार पाँच सय ४३ सङ्कलन भएको प्रवक्ता ढकालले जानकारी दिए । 

चालु आर्थिक वर्षमा हालसम्म सङ्कलित राजस्व तथ्याङ्कको विश्लेषण गर्दा राजस्व सङ्कलन रु छ अर्ब पाँच करोड १७ लाख ४४ हजार ७९४.२२ पैसा हुने प्रक्षेपण गरिएको छ जुन गत आर्थिक वर्षको तुलनामा ३५ दशमलव १७ प्रतिशतले बढी हुने आङ्कलन गरिएको छ । उक्त रकम मासिक औसत रु ५० करोड ४३ लाख १२ हजार ६६ का दरले हुन आउँछ । चालु आर्थिक वर्षको फागुन मसान्तसम्म आठ महिनाको राजस्व सङ्कलन गत आर्थिक वर्षको आठ महिनाको तुलनामा ५० दशमलव २८ प्रतिशतले राजस्व सङ्कलनमा वृद्धि भएको प्रहरीको तथ्याङ्कले देखाएको छ । आर्थिक वर्ष २०७८/७९ र आर्थिक वर्ष २०७९/८० को फागुन मसान्तसम्मको राजस्व सङ्कलन दुवै आर्थिक वर्षको आठ/आठ महिनाको तुलना गर्दा १० दशमलव  ४ प्रतिशतले राजस्व सङ्कलनमा कमी आएको देखिन्छ । 

यसैगरी, आर्थिक वर्ष २०७८/७९ को फागुन मसान्तसम्म रु दुई अर्ब ९९ करोड एक लाख ४३ हजार २४८. ६२ पैसा र चालु आर्थिक वर्षको फागुन मसान्तसम्म रु चार अर्ब तीन करोड ४४ लाख ९६ हजार पाँच सय २९ रूपैयाँ ४८ पैसा बराबर राजस्व सङ्कलन भएको देखिन्छ । दुवै आर्थिक वर्षको आठ महिनाको राजस्व सङ्कलन दर तुलना गर्दा ३५ दशमलव १८ प्रतिशतले वृद्धि भएको उनले बताए ।

'वर्तमान गृहमन्त्रीज्यूको पद बहाली मितिभन्दा अगाडिको २२ दिन र पछाडिको २२ दिन अवधिको फैसला कार्यान्वयनबाहेकको राजस्व सङ्कलनतर्फको तथ्याङ्क विश्लेषण गर्दा समग्रमा २४ दशमलव ५० प्रतिशतले राजस्व सङ्कलन वृद्धि भएको र सीमा क्षेत्रमा नेपाल प्रहरीको सक्रियता बढेकै कारण राजस्व सङ्कलन वृद्धि तथा चुहावट नियन्त्रणमा उल्लेखनीय योगदान पुगेको हो,' प्रवक्ता ढकालले भने ।