काठमाडौँ- नेपालको प्रादेशिक र स्थानीय सडक सुधार आयोजनाका लागि विश्व बैंकले नेपाललाई एक सय मिलियन अमेरिकी डलर सहुलियतपूर्ण ऋण उपलब्ध गराउने भएको छ ।

नेपालको प्रादेशिक र स्थानीय सडक सञ्जालको व्यवस्थापनका लागि विश्व बैंकको अन्तर्राष्ट्रिय विकास संघले उक्त सहुलियतपूर्ण ऋण उपलब्ध गराउने भएको हो । सो सम्बन्धी सम्झौतामा सोमबार अर्थमन्त्रालयमा हस्ताक्षर भएको छ । त्यस्तै प्रदेश र विश्व बैंकबीच छुट्टाछुट्टै परियोजनामा पनि सम्झौता भएको छ । प्रादेशिक तथा स्थानीय सडक सुधार कार्यक्रम अन्तर्गत करिब १० लाख जनतालाई लाभान्वित हुने गरी करिब ३ सय किलोमिटर सडकको सुधार गरिने बताइएको छ ।

---

यस कार्यक्रमले ग्रामीण सम्पर्क विस्तार गर्न, सेवा र बजारमा पहुँच सुधार गर्न र यात्रा समय र लागत घटाउँदै नेपालको आर्थिक सम्भावनालाई अघि बढाउन मद्दत गर्ने अर्थ मन्त्रालयका सहसचिव श्रीकृष्ण नेपालले बताए ।

तीन चरण अन्तर्गतको पहिलो कार्यक्रमले नेपालका सात प्रदेशमध्ये तीन र चार स्थानीय क्षेत्रलाई लक्षित गरी आगामी चरणमा विस्तार गरिने बताइएको छ । आयोजना प्रदेशका भौतिक पूर्वाधार मन्त्रालय अन्तर्गत कार्यान्वयन हुने मन्त्रालयले जनाएको छ ।