सिनामंगलको हवाई इन्धन डिपो स्थानान्तरण हुने

काठमाडौँ - नेपाल आयल निगमको सिनामंगलमा रहेको हवाई इन्धन डिपो स्थानान्तरण हुने भएको छ ।

बुधबार निगमको हवाई इन्धन डिपो सिनामंगल र त्रिभुवन विश्वविद्यालय इन्जिनियरिङ अध्ययन संस्थान (कन्सल्टेन्सी सेवा)बीच नयाँ डिपो निर्माणका लागि डीपीआर बनाउन सम्झौता भएको हो । डिपोको कारण स्थानीय बासिन्दाका साथै हवाई उड्डयन क्षेत्र समेत जोखिममा रहेकाले डिपो स्थानान्तरण गर्ने तयारी गरेको हो ।

---

कार्यक्रममा निगमका सिनामंगल डिपो प्रमुख प्रदीपकुमार यादवले डिपो गुह्येश्वरीतर्फ ५० रोपनी जग्गामा डिपो सार्ने निर्णय भएको बताए । उनले नयाँ बन्ने डिपोमा ३ हजार किलोलिटर क्षमताका ५ वटा भण्डारण ट्यांक निर्माण गरिने जानकारी दिए । 

नयाँ डिपो निर्माणका लागि डीपीआर बनाउन दुई संस्थाबीच एक करोड ९८ लाख ८४ हजार १ सय ८३ रुपैयाँमा सम्झौता भएको हो । हाल सिनामंगल हवाई इन्धन डिपोको भण्डारण क्षमता सात हजार ६ सय ६० किलोलिटर रहेको छ ।