४८.४२ अंकले खस्कियो नेप्से, कारोबार रकम घट्यो

काठमाडौँ – सेयर बजार मापक नेप्से परिसूचक ४८.४२ अंकले खस्किएको छ । मंगलबार भारी अंक घट्न सुरु गरेको नेप्सेमा गिरावटले दोस्रो दिन पनि निरन्तरता पाएको हो । १.५५ प्रतिशतले घटेको नेप्से परिसूचक ३०७६.४४ बिन्दुमा पुगेको छ ।

मौद्रिक नीतिमार्फत सेयर धितो कर्जामा राष्ट्र बैंकले गरेको कडाइका कारण नेप्सेमा गिरावट आइरहेको अनुमान गरिएको छ । सेयर धितो कर्जामा खुकुलो नीतिका कारण ठूला कारोबारीहरूले ऋण लिएर सेयर बजारमा लगानी गरिरहेका थिए । तर, राष्ट्र बैंकले कर्जामा बिर्को लगाएपछि कारोबारीहरू बजारबाट बाहिरिन खोजिरहेको हुनसक्ने अड्कल गरिएको छ ।

विकास बैंक र निर्जीवन बीमा समूहका कम्पनीहरूको सेयर मुल्यमा उच्च गिरावट आएको छ । त्यस्तै सेयर बजारमा उल्लेख्य बर्चस्व राख्ने बैंकिङ समूहको परिसूचक समेत खस्किएको छ ।

जीवन विकास लघुवित्त र आइसिएफसी फाइनान्सको सेयर मुल्यमा भने उच्च वृद्धि भएको छ । खानीखोला जलविद्युत्‌को सेयर मूल्यमा ठूलो अंकको गिरावट आएर सर्किट ब्रेकर नै लागेको छ ।

२० अर्बभन्दा माथि पुगेको सेयर कारोबारको रकम खुम्चिएर १२ अर्बमा सीमित भएको छ । एक लाख १८ हजार नौ सय १७ पटकको किनबेचमा एक करोड ९५ लाख कित्ता सेयर किनबेच भएको छ ।   

---