पाँचखाल नगरपालिका र नबिल बैंकबीच साझेदारी

काभ्रे – पाँचखाल नगरपालिका र नबिल बैंकबीच साझेदारी भएको छ । उद्यमशीलता विकास र वित्तीय पहुँचका लागि पाँचखाल नगर र नबिल बैंकको साझेदारी सम्झौतापत्रमा हस्ताक्षर गर्दै साझेदारी भएको हो ।

पाँचखाल नगरपालिका  उपप्रमुख लक्ष्मी दनुवार र नबिल बैंक बागमती प्रदेश प्रमुख अमित श्रेष्ठले साझेदारी सम्भौतापत्रमा हस्ताक्षर गरेका छन् । उक्त साझेदारीमार्फत नगरपालिकाले स्थानीयस्तरमा सञ्चालन गर्ने विभिन्न उद्यमसम्बन्धी कार्यक्रम तालीम लिएर उद्यम गर्न चाहने उद्यमीलाई नगरपालिकाको सिफारिसमा बैंकले कर्जा उपलब्ध गराउने र त्यस्ता कार्यक्रम र तालीममा वित्तीय साक्षरतासम्बन्धी अभिमुखीकरण कार्यक्रमसमेत सञ्चालन गर्ने उद्देश्य रहेको छ।

---

पाँचखाल नगरमा भएको सम्झौता कार्यक्रममा नगर उपप्रमुख दनुवारले पाँचखाल शाखालाई नबिल दिगो बैंकिङ पाइलट शाखा, नबिल दिगो उद्यमशील बनाएकोमा धन्यवाद ज्ञापन गर्दै नबिल बैंकसँग नगर विकास र रोजगारी सिर्जनामा हातेमालो गर्ने बताइन् । सम्झौताले रोजगारी र उद्यमशीलता विकास गरी सामाजिक रूपान्तरणमा सहयोग गर्ने  नबिल बैंक बागमती प्रदेश प्रमुख श्रेष्ठले भने । 

बैंकले ग्रामीण क्षेत्रमा वित्तीय पहुँच न्यून भएका वर्गलाई कृषि क्षेत्रको व्यावसायीकरण र उद्यमशीलता विकासको लागि ल्याएको यो कार्यक्रम सुरुमा १७ वटा दुर्गम शाखबाट सञ्चालन गरी बैंकले नबिल किसान कर्जा र नबिल उद्यमशील कर्जा प्रवाह गर्दै आएको श्रेष्ठले जानकारी दिए ।