मझगाउँ विमानस्थल दुई वर्षभित्रै सञ्चालनमा ल्याउँछौं : प्रेम आले

कञ्चनपुर – संस्कृति, पर्यटन तथा नागरिक उड्डयनमन्त्री प्रेम आलेले कञ्चनपुरस्थित मझगाउँ विमानस्थल दुई वर्षभित्रै सञ्चालनमा ल्याउने दाबी गरेका छन् । बुधबार महेन्द्रनगरस्थित मझगाउँ विमानस्थल क्षेत्रको अवलोकनका क्रममा उनले विमानस्थलको धावनमार्गको क्षेत्रफल बढाएर भए पनि विमानस्थल सञ्चालन गरिने बताए । ‘विमानस्थलसँग ७० बिघा जग्गा रहेको छ,’ उनले भने, ‘दक्षिणतर्फको ५ सय मिटर जग्गा अधिग्रहण गरी विमानस्थल विस्तार गर्छौं ।’ 

बन्द विमानस्थल सञ्चालन गर्नका लागि ५३ करोड ६० लाख रूपैयाँ बजेट विनियोजन भइसकेको उल्लेख गर्दै उनले बोलपत्र आह्वान (टेण्डर)को कार्य पूरा भएको बताए । ‘बोलपत्र आह्वान भइसकेको छ,’ उनले भने, ‘काठमाडौं फर्केलगत्तै सम्झौता गर्छौं । काम सुरु हुन्छ ।’ उनले कैलालीको गेटा विमानस्थललाई क्षेत्रीयस्तरको बनाउनका लागिसमेत कार्य अगाडि बढाइएको बताए ।

---