सेयर बजारमा १० दिन अघिको रेकर्ड ब्रेक, नेप्से कीर्तिमानी अंक नजिक

काठमाडौं : सेयर बजारमा बुधबार नेप्से परिसूचकले १० दिनअघिको आफ्नो रेकर्ड तोडेको छ । मंसिर २९ मा २०६७.१७ अंकको रेकर्ड बनाएको नेप्से परिसूचक बुधबार बन्द हुँदा २०६८ अंक नाँघेको छ ।

यो अहिलेसम्मकै उच्च अंकको करिब छ । मंसिर १७ मा नेप्से २०७१.०३ अंकमा पुगेर सबै रेकर्ड ब्रेक गरेको थियो । त्यसपछि सबैभन्दा बढी अंक मंसिर २९ मा पुगेको थियो । अब नेप्सेलाई अहिलेसम्मकै किर्तिमानी उचाइ भेट्नका लागि २.४७ अंक अपुग छ ।

---

संघसंस्था तथा कम्पनीहरूको साधारणसभा नजिकिँदै जाँदा सेयर बजारमा उछाल आइरहेको छ । विगतजस्तै बढ्दो बजारले अहिले धेरै लगानीकर्ताको ध्यान तानेको छ । कोरोना महामारीबीच अधिकांश सूचीकृत कम्पनीको नाफा घटिरहेको अवस्थामा छ ।

यस्तो बेला सेयर बजार भने लगातार उकालो लाग्नुलाई स्वाभाविक मानिएको छ । यस्तो अवस्थामा कसले कति लाभांश दिन्छ भन्दा पनि सेयर बजारमा लगानीकर्ताले कुन कम्पनीको सेयर मूल्य कतिसम्म बढ्नसक्छ भन्ने आकलन गर्छन् ।

अरु लगानीका क्षेत्रबाट नाफा खुम्चिँदै गएपछि लाभांश नभएर सेयर मूल्यवृद्धिबाट हुने नाफाका लागि लगानी गर्ने भएकाले असहज परिस्थितिमा सेयर बजार उचाइमा पुगेको हो ।

बुधबारको कारोबारमा १२ ओटा समूहको परिसूचकमध्ये ९ समूहको परिसूचक घटेको हो । जीवन बिमा, म्यूचुअल फन्ड र बैंकिङ समूहको परिसूचकबाहेक सबै समूहको परिसूचक घटेको छ । जीव बिमामा झन्डै ४ सय अंकले वृद्धि भएको छ ।

बैंकिङ क्षेत्रमा सबैभन्दा बढी लभांश घोषणा गरेको नबिल बैंकको सेयर १३५ अंकले बढेर बन्द भएको छ । समृद्धि फाइनान्स कम्पनी लिमिटेड पनि १३ अंकले बढेर सबैभन्दा धेरै मुल्यवृद्धि भएको कम्पनीहरुको सूचीमा छ । फर्वार्ड कम्युनिटी माइक्रोफाइनान्सको सेयर १२० अंकले बढेको छ ।

५० वटा कम्पनीका सेयरमा पहिरो

नेप्से परिसूचकले किर्तिमानी अंक पछ्याइरहँदा ५० वटा कम्पनीका सेयर भाउमा भने पहिरो गएको छ । नारायणी डेभलपमेन्ट बैंक ९.८६ प्रतिशतले घटेको छ । युनाइटेड ईदी मार्दी आरबी हाइड्रो पावर पनि ९ प्रतिशतले नै घटेको छ । एभरेष्ट इन्स्योरेन्स कम्पनी लिमिटेड प्रोमोटर सेयर पनि ७ प्रतिशतले घटेको हो ।

हिजो सबभन्दा सेयर मूल्य बढेका कम्पनीमा परेको राष्ट्रिय बिमा कम्पनी लिमिटेड प्रोमोटर सेयरमा गिरावट आएको छ । यो ५.८ प्रतिशतले घटेको हो । रुरल माइक्रो फाइनान्स डेभलपमेन्ट सेन्टरको सेयर भाउ ५.८ प्रतिशतले घटेको छ । 
यस अवधिमा २०३ वटा कम्पनीको ५१ हजार ३०२ पटकको कारोबारमा १ करोड १५ लाख ५८ हजार ००१ कित्ता शेयरको ६ अर्ब ८६ करोड २४ लाख बराबरको खरीदबिक्री भएको छ ।