पोखरामा सञ्चालन हुँदै केबलकार

पोखरा – पोखरामा पाँच वर्षअघि निमार्ण थालिएको केबलकारको परीक्षण गरिएको छ । पोखरा महानगरापालिका–१८ लेकसाइडस्थित सेतीबाट सरांकेट जान आउने केबलकारको बुधबार परीक्षण गरिएको कम्पनीका निर्देशक तीर्थराज त्रिपाठीले जानकारी दिए । 

त्रिपाठीकाअनुसार अन्नपूर्ण केबलकार प्रालिले बनाएको यो केबलकार परीक्षणका लागि जापानबाट सात जना प्राविधिकको टोली  पोखरा आएको हो । दुई हजार ४ सय मिटर लामो यो केबलकारका १३ टावर छन् । यो केबलकारमा १८ वटा डिब्बा छन् । एकमा भने सामान राख्न प्रयोग गरिनेछ । प्रतिडिब्बामा आठ जनाको सिट क्षमता रहने जनाइएको छ  । टोलीले सबै प्राविधिक पक्ष सफल भएको जनाएको छ ।

---

करिब साढे दुई वर्षमा निर्माण सम्पन्न गर्ने लक्ष्य लिए पनि काेभिडका कारण निर्धारित समयभन्दा बढी लागेको त्रिपाठीले बताए । ‘हामीले साढे दुई वर्षमा सम्पन्न गर्ने लक्ष्य राखेका थियौं तर काेभिडले गर्दा समय पनि लम्बियो र लागत पनि बढी देखियो,’ उनले भने ।उनले योजनाको प्रारम्भिक खाकामा करिब एक अर्ब रूपैयाँमा योजना सम्पन्न लक्ष्य लिए पनि निर्माण अघि बढ्दै जाँदा पूर्वाधारलगायतका जमिन थपिँदै गएपछि लागत बढी लागेको बताए ।