घटेको कमिशनले लोभिएनन् लगानीकर्ता, कारोबार निरन्तर ओरालो लाग्दै

काठमाडौं : आइतबारदेखि लगानीकर्ताले सेयर किनबेच गरेबापत तिर्नुपर्ने (ब्रोकर कमिशन) सेवा शुल्क ३३ प्रतिशतले घटेपनि सेयर बजारमा लगानीकर्ताको आकर्षण घटेको छ । साताको सुरुवातदेखि कारोबार रकम घटिरहेको छ ।

सोमबार सेयर कारोबार ३ अर्ब ८५ करोड रुपैयाँमा मात्रै सीमीत रह्यो । आइतबार यो कारोबार ४ अर्ब ५९ करोड रुपैयाँ कायम भएको थियो । कारोबार रकम घटेपनि नेप्से परिसूचक ८ दशमलव ५७ अंकले बढेर २००७.२९ पुगेको छ । यद्यपि आइतबारको ४० अंकले आएको गिरावटको तुलनामा सामान्य मानिएको छ ।

---

ब्रोकर कमिशन ३३ प्रतिशतले घटाएपछि बढी नाफा कमाउन पाउने लोभमा लगानीकर्ताहरू सेयर बजारमा आकर्षित हुने आम अपेक्षा थियो । तर, बजारमा लगानीकर्ताको उत्साह देखिएको छैन ।

सेयर बजार विश्लेषकहरूले यसलाई राजनीतिक घटनाक्रमसँग जोडेर समेत हेर्नेगरेका छन् । गत साता आइतबार प्रधानमन्त्री केपी ओलीले प्रतिनिधिसभा विघटन गरेसँगै सेयर बजारमा भीषण पहिरो गएको थियो । तर, सेयर कारोबार रकम भने अहिलेसम्म कै उच्च ९ अर्ब ४ करोड रुपैयाँ पुगेको थियो । राजनीतिक अस्थिरताको त्रासले लगानीकर्ताहरू सेयर बजारबाट बाहिरिएको अनुमान धेरैले गरेका थिए ।

तर सर्वोच्च अदालतमा प्रतिनिधि सभाको रिट परेपछि दोस्रो दिन सोमबार कारोबारमा सुधार आयो । कारोबारको रकमसँगै नेप्से परिसूचक पनि बढ्न थाल्यो । बुधबारसम्म कीर्तिमानी अंकको आसपास पुगेको नेप्से परिसूचकमा विहीबार सामान्य करेक्सन देखियो । यद्यपि ब्रोकर कमिशन घटाउने धितोपत्र बोर्डको निर्णयले बजारलाई बढाउन टेवा पुग्ने आम अपेक्षा थियो ।

नेकपाको कलहले प्रभावित मुलुकको राजनीतिक घटनाक्रममा आइतबार ट्विस्ट आउने संकेत देखिएको छ । चिनियाँ नेता समूह आइतबार नेपाल आएर नेकपा विवादको विषयमा सम्बन्धित नेताहरूसँग छलफल गरिरहेका छन् । जसले लगानीकर्ताहरू 'पर्ख र हेर'को अवस्थामा रहेको अनुमान गरिएको छ । पुस मसान्तसम्म विभिन्न संघसंस्था तथा कम्पनीहरूको वार्षिक साधारणसभा नजिएको छ । यस्तो अवस्थामा लगानीकर्ताहरू होमिएर लगानी गर्ने भन्दा संयमित भएर बसेको हुनसक्ने विश्लेषकहरू बताउँछन् ।

तीनवटा समूहका परिसूचक घट्यो

सोमबारको कारोबारमा ट्रेडिङ, विकास बैंक र अन्य क्षेत्र गरी तीन वटा समूहको परिसूचक घटेको छ । सबैभन्दा बढी ट्रेडिङ समूहमा गिरावट आएको छ । यो २.४६ प्रतिशतले घटेको छ । वृद्धि हुनेमा म्यानुफ्याक्चरिङ क्षेत्र सबैभन्दा बढी छ । यो समूहको परिसूचक २.०४ प्रतिशतले बढेको छ ।

सैबैभन्दा बढी नारायणी विकास बैंकको सेयर बढेको छ । त्यसपछि सेन्ट्रल फाइनान्स कम्पनी लिमिटेडको सेयर बढेको छ ।

एनआइसी एशिया बैंकको सेयर ४४ अंकले बढेको छ । शिवम सिमेन्टको सेयर ६१ अंबले बढेको छ । प्रभु बैंकको सेयर पनि १५ अंकले बढेको छ ।