सेयर बजारमा नयाँ कीर्तिमानी

काठमाडौं : सेयर बजार सूचक नेप्सेले साताको अन्तिम दिन विहीबार आफ्नो पुरानो कीर्तिमान तोडेको छ । बिहीबार नेप्से २५.२१ अंकले बढेर २ हजार ८७ दशमलव २७ विन्दुमा पुगेको हो । मंसिर १७ मा नेप्सेले कायम गरेको कीर्तिमान तोडिएको हो । त्यतिबेलामा नेप्से २०७१.०३ मा पुगेर रोकिएको थियो ।

विहीबारकै अन्तरदिवसीय (इन्ट्रा-डे) व्यापारमा नेप्से सूचकांक २११२.५९ अंक पार गरे पनि बजार बन्द हुँदा २०८७.२७ कायम भएको हो । ‍बिहीबार बजारलाई बढाउन साल्ट ट्रेडिङ, लक्ष्मी बैंक, एभरेष्ट बैंक, सिनर्जी पावर डेभलपमेन्ट, एसबीआइ बैंकले ठूलो सहयोग गरे ।

---

‍साल्ट ट्रेडिङ कर्पोरेशनको सेयर सर्वाधिक १० प्रतिशतले बढेर प्रतिकित्ता ६ हजार २ सय ८१ रुपैयाँ कायम भएको छ । साल्टको सेयर पाँच सय ७१ अंकले बढेको हो ।

लक्ष्मी बैंक, एभरेष्ट बैंक, सिनर्जी पावर डेभलपमेन्ट, एसबीआइ बैंक लगायतका कम्पनीहरूको सेयरमा वृद्धि भएको छ ।

एक सातापछि लयमा फर्कियो कारोबार

सेयर बजारमा कारोबारमा पनि वृद्धि भएको छ । विहीबार ५ अर्ब ७० करोड रुपैयाँ बराबरको सेयर कारोबार भएको छ ।

गत साता विहीबारदेखि सेयर बजारमा कारोबार घट्न थालेको थियो । ६ अर्ब ८६ करोड रुपैयाँसम्म पुगेको कारोबार विहीबारदेखि निरन्तर ओरालो लागेको थियो । मंगलबार त कारोबार घटेर ३ अर्ब ८५ करोड रुपैयाँ पुगेको थियो ।  

'ईन्ट्रा डे हाइ' नजिक पुगेर झर्‍यो

विहीबार नेप्से ईन्ट्रा डे हाइ विन्दुको नजिक पुगेर झरेको थियो । सुरुवाती कारोबार दिउँसो १२:४१ मा २११२.५९ विन्दुमा पुगेको थियो ।  

मंसिरमा २९ मा नेप्से परिसूचक ५६.७२ अंक अर्थात २.८२ प्रतिशत बढेर २०६७.१७ बिन्दुमा बन्द भएको थियो। यो ‘अलटाइम हाइ क्लोजिङ्ग’ भन्दा ४ अंक तल हो। यस अघि गत मंसिर १७ गते नेप्से २०७१.०३ विन्दुमा बन्द भएको थियो। जुन हालसम्मकै उच्च बन्द बिन्दु हो । यद्यपि, नेप्से त्यसपछिको कारोबार दिन अर्थात मंसिर १८ गते २११८.६८ बिन्दुसम्म पुगी २०५५.४६ विन्दु झरेर बन्द भएको थियो। सो २११८.६८ विन्दु हालसम्मकै उच्च ‘इन्ट्रा डे हाइ’ विन्दु हो ।

कारोबारमा आएका १२ समूहका परिसूचक मध्ये निर्जिवन बीमा बाहेक सबै परिसूचक बढेको छ । निर्जिवन बीमा ९६.४३ अंकले घटेको छ ।