टेलिकमले ल्यायो ‘एनटी च्याटबोट’

काठमाडौँ : नेपाल टेलिकमले विभिन्‍न सेवाको जानकारी दिन ‘एनटी च्याटबोट’ सेवा शुभारम्भ गरेको छ । टेलिकमका सह-प्रवक्ता एवं उप-प्रबन्धक रंजित लोहियाले टेलिकमका विभिन्‍न सेवाहरू तथा सेवा प्रदान गर्ने विधिहरूको बारेमा कम्पनीको वेबसाइटबाटै च्याटमार्फत स्वचालित रूपमा जानकारी प्राप्त गर्न सकिने गरी ‘एनटी च्याटबोट’ सेवा शुभारम्भ गरिएको बताए । 

कम्पनीको वेबसाइट खोल्नासाथ एनटी च्याटबोटको सानो स्क्रिन देखा पर्ने र त्यहिंबाटै च्याट गरी आफूलाई चाहिएको जानकारी लिन र गुनासो राख्‍न सकिने पनि सह-प्रवक्ता लोहियाले बताए । च्याटबोटमा कम्पनीका विभिन्‍न सेवाहरूको बारेमा जानकारी लिनका लागि उपलब्ध विकल्पको छनौट गर्न तथा नेपाली वा अंग्रेजी भाषा छनौट गरी प्रश्‍न लेखेर जिज्ञासा राख्‍न सकिनेछ । कम्पनीका विभिन्‍न सेवाहरू फोरजी, एफटीटीएच, जीएसएम प्रिपेड, जीएसएम पोस्टपेड, ल्यान्डलाइन, एनटी एप, अनलाइन रिचार्ज, अफर, प्याकेज आदिको बारेमा च्याट गरेर सजिलै जानकारी प्राप्त गर्न सकिन्छ ।

---

एनटी च्याटबोटको माध्यमबाट विभिन्‍न सेवाहरूका बारेमा फिडब्याक दिन र सिकायत/गुनासो गर्न समेत सकिने व्यवस्था समेत गरिएको छ । सिकायत वा गुनासोको सम्बोधन च्याटबोटमार्फत स्वचालित रूपमा हुन नसकेमा कम्पनीको सम्बन्धित विभागका पदाधिकारीले अध्ययन गरी गुनासो व्यवस्थापन गर्ने व्यवस्था समेत टेलिकमले गरेको छ ।