९० अंकले बढ्यो नेप्से, निफ्राको ५३ करोडको कारोबार

काठमाडौंः नेपाल स्टक एक्स्चेन्ज (नेप्से) परिसूचक साताको अन्तिम कारोबार दिन बिहीबार ९०.६७ अंक अर्थात् ३.७५ प्रतिशतले बढेको छ । सेयर मूल्य मापन गर्ने नेप्से परिसूचक बिहीबार २,५०६.६८ बिन्दूमा पुगेको छ । 

नेप्सेका सूचीकृत ‘क’ वर्गका कम्पनीहरूको सेयर मूल्य बिहीबार उल्लेख्य बढेपछि बजार उकालो लागेर पुनः २,५०० बिन्दूको थ्रेसहोल्ड पार गरेको हो । बैंकहरूमा अधिक तरलताको स्थितिले सस्तो ब्याजको ऋण उपभोग गरिरहेका लगानीकर्ता तरलता कम भएसँगै चैतपछि ब्याज बढ्ने र सम्भावित मार्जिन कलको दबाबमा सेयर बेचेर बाहिरिएको विश्लेषण गरिएको थियो । 

---

बजार २,४०० बिन्दूको आसपासमा आएपछि भने बिहीबार सेयर बजारमा पुनः खरिदको चाप परेको छ । ‘क’ वर्गका कम्पनीहरूको सेयर मूल्य मापन गर्ने सेन्सेटिभ इण्डेक्स ३.३६ प्रतिशत अर्थात् १४.६७ ले बढेको छ ।

बिहीबार पनि अन्य समूहमा सूचीकृत नेपाल इन्फ्रास्ट्रक्चर बैंक (निफ्रा)को ११ हजार सात सय ९५ ओटा कारोबारबाट ५३ करोड २३ लाख रुपैयाँको सेयर कारोबार भएको छ । 

आज नेप्सेका सबै समूहका परिसूचक उकालो लागेपछि सेयर बजारमा हरियाली छाएको छ । अन्य समूह, इन्भेष्टमेन्ट र म्यानुफ्याक्चरिङ एण्ड प्रडक्सन सेक्टरको परिसूचक क्रमशः ५.४४, ५.२६ र ५.०६ प्रतिशतले बढेको छ । जलविद्युत् समूहको परिसूचक ४.७८ प्रतिशतले बढेको छ । 

बिहीबार पनि अन्य समूहमा सूचीकृत नेपाल इन्फ्रास्ट्रक्चर बैंक (निफ्रा)को ११ हजार सात सय ९५ ओटा कारोबारबाट ५३ करोड २३ लाख रुपैयाँको सेयर कारोबार भएको छ । 

सूर्योदय लघुवित्त वित्तीय संस्था, लिबर्टी इनर्जी लिमिटेड र चन्द्रागिरी हिल्सको सेयर मूल्यमा आज सर्किट ब्रेकर लागेको छ । 

बिहीबार नेप्सेमा २०६ कम्पनीको ६ अर्ब ५ करोड ८१ लाख रुपैयाँ मूल्यका ६५ हजार एक सय ७४ कारोबारबाट १ करोड ६६ लाख २२ हजार सात सय ६३ कित्ता सेयर किनबेच भएको छ । 

मिति	नेप्से इण्डेक्स	कारोबार रकम
फागुन १६ , आइतबार	२,४७४‍.३९	८ अर्ब ३५ करोड रुपैयाँ
फागुन १७, सोमबार	२,५१५.०३	५ अर्ब ६९ करोड रुपैयाँ
फागुन १८, मंगलबार	२,४५५.३३	६ अर्ब ११ करोड रुपैयाँ
फागुन १९, बुधबार	२,४१६	६ अर्ब २५ करोड रुपैयाँ
फागुन २०, बिहीबार	२५०६.६८	६ अर्ब ५ करोड रुपैयाँ