एलसी नखोली एक लाख डलरसम्म सामान आयात गर्न पाइने

काठमाडौं :  प्रतीतपत्र (एलसी) नखोली एक लाख अमेरिकी डलरसम्मको सामान आयात गर्न पाइने भएको छ । नेपाल राष्ट्र बैंकले डिएपी तथा डिएए माध्यमबाट सामान आयात गर्दा एक लाख डलरसम्मको सामान आयात गर्न पाउने भन्दै निर्देशन संशोधन गरेको हो ।

यसअघि गत साउन १३ मा विदेशी मुद्रा बाहिरिएको निष्कर्ष निकाल्दै राष्ट्र बैंकले एक पटकमा ५० हजार अमेरिकी डलरसम्म आयात गर्न पाउने निर्देशन जारी गरेको थियो ।

---

नेपाल राष्ट्र बैंकले चालु आर्थिक वर्षको मौद्रिक नीतिमार्फत् डकुमेन्ट्स अगेन्स्ट पेमेन्ट (डिएपी) र डकुमेन्ट अगेन्स्ट एसेप्टेन्स (डिएए)को आधारमा हुने भुक्तानीमा सीमा निर्धारण गरिदिएसँगै विदेशी निर्यातकर्ता र नेपाली आयातकर्ताबीच हुने उधारो कारोबार कम हुने भएको हो ।

मौद्रिक नीतिमा डिएपी र डिएएसम्बन्धी व्यवस्थाअनुसार हुने आयातमा अमेरिकी डलर ५० हजारसम्मको सीमा निर्धारण गर्ने उल्लेख छ । मौद्रिक नीति आउनुअघि यस्तो आयातमा डलर सटही सुविधामा कुनै सीमा तोकिएको थिएन ।